Tsunami survivor mipaambit

CEBU, Philippines - “But what we gained far outweighs what we had lost.” Kini maoy gipamulong ni  Kei-ichi Sugawara, usa sa mga delegado gikan sa Japan nga nitambong alang sa 51st International Eucharistic Congress dinhi sa Dakbayan sa Sugbo.

Ang mao niyang pamahayag may labot kini sa iyang kasinatian dihang naigo sa tsunami ang Ofunato City sa Iwate Prefecture sa Japan diin sila magpuyo niadtong 2011. Iyaha pang nahinumduman nga alas  2:46 p.m. niadtong Marso 11, 2011 dihang gitay-og sila sa magnitude 9 nga linog gikan sa dagat.

“Nobody in my town had ever experienced such a strong earthquake which lasted like eternity,” sumala pang Sugarawa. Paglabay sa pipila ka minutos, nisulya ang tubig sa dagat ug mibanlas sa siyudad ug giharos ang tanan niini maagian. Human sa hitabo, 15 mil ang patay ug 300 mil ka balay ang nangaguba.

Samtang nagsige og paambit si Sugawara, iyaha usab gipakita ang mga hulagway sa ilang lugar nga nagpakita kun giunsa pagbanlas sa tsunami ang kabalayan, sakyanan, mga tawo, ug uban pa. Ang simbahan lang sa Romano Katoliko nga gitukod sa taas nga bahin sa ilang dapit ang wala maigo, apan ang mga sakop sa ilang gamay kaayo nga mga miyembro sa Romano Katolikong simbahan naapil sa mga nakalas.

Sumala pa niya, aduna lamang sila 100 ka miyembro kaniadto sa wala pa ang trahedya , 20 ngadto sa 25 lang ka tawo ang kanunay nga mosimba matag adlaw nga Domingo apil na niini ang duha ka Filipina nga nakabana og mga Buddhist.

Matud pa niya ang mga langyaw nga nakabana og Hapones nga di Kristiyano dili gyud makahigayon pagsimba, apan lahi sa duha ka Filipina didto. Ang maong duha ka Filipina maoy nitabang pagpangita sa uban pang mga Filipino ug mga langyaw nga nabiktima ug naka-survive. Matud pa niya, sa paglabay sa pipila ka bulan, ilang namatikdan nga nagkaanam kadako ang ilang parokya.

Human sa maong trahedya, daghang mga bata ang gibunyagan ug mao kini ilang gisaligang kaugmaon sa ilang parokya.

Sumala pa niya, daghan tuod sa ilang mga miyembro ang nakalas sa tsunami apan nidoble kini karon ug aktibo. Usa sa ilang awiton sa Santos nga Misa matag Domingo didto ang “Ama Namin” o “Amahan Namo.”

Aduna karoy duha ka paring Filipino ug usa ka Indonesian nga nag-establisar og “Support Center for Foreigners” sa Ofunato ug magmisa usab og Tinagalog kausa sa usa ka buwan.

“The disaster brought down not only physical walls, but walls of indifference and prejudice… I’d like to believe that our small parish in Ofunato, a community gathered in the name of Jesus Christ, has been an instrument of God to realize His plan,” matud pa ni Sugarawa.  (BANAT NEWS)