Kapin P600mil shabu nasakmit

CEBU, Philippines – Kapin sa P600 mil nga kantidad sa shabu ang nasakmit sa mga sakop sa Provincial Intelligence Branch (PIB) sa Cebu Provincial Police Office diha sa Sitio Lumboy, Brgy. Liburon sa Dakbayan sa Carcar kagahapon sa hapon atol sa gilusad nga buy-bust operation.

Nasikop sa maong operasyon sila si Joel Castañares ug Mildred Alcoseba, nga nakuhaan og daghang mga drugas.

Sumala pa sa kapulisan nga dugay na nila nga gipanid-an ang illegal nga kalihokan sa mga suspetsado sukad nga nakadawat sila og impormasyon kabahin sa usa ka alyas Joel nga namaligya og drugas sa maong dapit.

Gamit ang P200 nga buy-bust money, nakapalit og drugas ang asset sa kapulisan hinungdan nga dali usab nga mihamag ang kapulisan.

Nasakmit sa taga PIB gikan sa mga suspetsado ang 55.54 gramos nga shabu nga mikantidad og P655, 372,000.

Gawas sa shabu, usa ka .45 caliber pistol ang nakuha sa mga pulis nga adunay unom ka mga bala. Gitanggong na sa selda ang duha ka mga dinakpan nga gikatakdang pasakaan og tukmang kaso.

Samtang nasakmit sa kapolisan ang mokabat P60 mil nga kantidad nga shabu uban sa armas nga kalibre .45 ug mga bala niini human sa pag-serve sa search warrant batok sa usa ka gipasanginlang drug pusher diha sa San Remigio.

Ang warrant giluwatan ni Branch 61 Judge Antonio Marigumen sa Regional Trail Court sa Dakbayan sa Bogo batok sa magtiayong Ronald Flores Potestad,36, ug asawang si Herluna,32.

Si Police Office 1 Jeffrey Lequim sa San Remigio Police Station mitug-an hepe nga si Police Senior Inspector Stephanie Amamag-id  nga maoy nangulo sa operasyon nakasakmit og duha ka dagkong paketeng may sud nga gidudahang shabu gikan ni Ronald.

Samtang ang asawa nasakmitan usab sa kapolisan og 13 ka gagmay nga pakete uban sa mga drug paraphernalia ug P9, 770 nga salapi nga gituohang halin sa drugas. Dugang nga nasakmit mao ang 42 pa ka gagmay nga paketeng shabu gikan sa ilang panimalay.

Samtang ang usa ka Laarni Grape,  32 anyos  nga taga Marfa, Maguikay, Dakbayan sa Mandaue ang nadakpan usab sa buy-bust operation sa kapolisan sa Presinto 4 sa Mandaue City Police Office (MCPO) nga gipangulohan ni PO3 Brendo Mendayos ug mga kauban.

Nasakmit gikan kaniya ang duha ka paketeng shabu. – /EIM) (BANAT NEWS)