Minor tigtunol og shabu sa papa

CEBU, Philippines - Kapin sa P300 mil nga kantidad sa shabu ang nasakmit sa kapolisan sa probinsya ug siyudad sa managlahing pagpangronda sa nakalabay nga gabii.

Sa mao’ng operasyon lima ka tawo ang nadakpan.

Sa lungsod sa Consolacion, tulo ka managlahi’ng pagpangronda ang gilusad sa kapolisan nga gipangulohan sa hepe nga si Senior Insp. Wilson Abot.Alas 8:50 sa gabii una’ng nasikop ang 16-anyos nga anak sa Sitio Pagutlan, Tayud kinsa ang amahan niini nga nalakip sa “drugs watch list personalities” ang nakasibat.

Ang amahan giila nga si Bernadin Cabahug kinsa giingong makabaligya og shabu nga 15 gramos matag semana samtang ang anak nga nadakpan mao’y nitunol og shabu sa asset sa kapolisan.

Si Police Officer 1 Albert Jimenez nga kuyog sa pagpangronda nagkanayon nga gawas sa pagpahuyot og shabu nalambigit usab sa pangawat og motorsiklo si Cabahug.

Una’ng nakadawat og impormasyon ang kapolisan nga ang mga duna’y motorsiklo nga gipangawat sa Dakbayan sa Mandaue didto gidala sa balay ni Cabahug.

Apan sa pag-abot sa asset sa kapolisan sa gawas sa balay sa suspek, ang anak niini ang nanghagad sa asset sa pagpalit og shabu.

Human kini nakatunol sa drugas dali usab dayon nga nihamag ang kapolisan.

Ang amahan nga nakabantay sa mga polis ang dali usab nga nakasibat biniyaan ang iya’ng anak.

Mokabat sa P55 mil nga shabu ang nasakmit sa kapolisan gikan sa amahan lakip usab ang mga nagkadaiya’ng parte sa motorsiklo ug warranty cards sa mga motorsiklo.

Si Jimenez nidugang nga ila’ng gihatud sa Department of Social Welfare and Development ang anak sa suspek kay kini usa pa ka minor de edad apan kung makita nga duna na kini’y sakto’ng kabuot sa iya’ng gibuhat lagmit kini ihatud sa Operation Second Chance.

Samtang human sa pito ka minutos sunod nga nadakpan sa kapolisan ang 31-anyos nga lalaki nga sinaligan sa usa ka notado’ng drug pusher sa East Binabag.

Ang nadakpan mao si Lucio Trangia, 31, apan nakasibat si Willy Acay, nga mao’y target sa kapolisan.

Human nakabantay si Acay nga duna’y mga polis, nisutoy kini og dagan paingon sa ngitngit nga bahin ug gipanglabay ang shabu nga kantidad og P116,112. Katapusang pagpangronda sa kapolisan sa Consolacion natigayon sa sama’ng barangay ala-una na sa kadlawon.

Duha ka tawo ang nadakpan nga nakuhaan og kapin P200 mil nga kantidad sa shabu.

Ang mga dinakpan mao sila si Generoso Auman, 36, target sa kapolisan, ug Arman Arnaiz, 30, pareho nga nagpuyo sa mao’ng dapit.

Atol sa operasyon nakabantay si Arnaiz nga polis ang ila’ng gibaligyaan og shabu ug kini nisutoy og dagan.

Apan human sa ginukdanay kini nadakpan sa kapolisan.

Nakuha sa mga polis gikan sa mga dinakpan ang P233, 286 nga kantidad sa drugas.

Gipangpaslak na sa selda sa Consolacion Police Station ang mga dinakpan kinsa gikatakdang pasakaan og kaso. (BANAT NEWS)