Pusher nakaipsot, 13 nasikop

CEBU, Philippines - Nasikop ang 13 ka lalaki atol sa buy-bust operation sa kapolisan ug dungan niini ang pag-serve unta sa warrant of arrest sa usa ka wanted nga lalaki pasado alas 3 sa hapon niadto’ng adlaw sa Pasko sa Sitio Maglinte, Barangay New Bago, Lungsod sa Asturias.

Buot unta i-serve sa kapolisan sa Asturias ang warrant of arrest ni Johny Ylanan apan wala siya niadto’ng higayuna.

Ang kapolisan sa Asturias giabagan sa Tuburan Police Station, Special Weapon and Tactics (SWAT) sa Balamban ug sa 47th Infantry Battalion.

Apan kay wala man si Ylanan nagpahigayon na lang og buy-bust operation ang kapolisan ngadto ni Johny Gabilan apan nakaikyas diha’ng nakabantay sa mga polis.

Apan nasipong sa mga law enforcers sulod sa drug den sila si Marvin Maglasang, Joserey Nengasca, Rodelio Fonteras, Mark John Lato, Steven Dolino, Joel Lariosa, Michael Madraga, Bonifacio Homicillo kinsa pulos taga Tuburan; Loredel Gensis, Richard Gensis, Edwin Pologon kinsa taga Asturias; Christopher Mantuhak ug Mark Sinarlo, nga taga Balamban.

Ang operasyon gilusad human may taho nga nadawat si Senior Inspector Narciso Abapo nga ang wanted nga si Ylanan tua magpundohan sa mao’ng lugar.

Nakadawat sab og taho ang police station nga namaligya si Gabilan og drugas hinungdan nga gipahigayon nila ang buy-bust operation apan naka-ipsot ang gituohang drug pusher.

Diha’ng nikaratil og dagan si Gabilan, naukay ang mga lalaki sulod sa drug den apan gibabagan sila sa mga polis sa Tuburan ug SWAT ug lakip sa nidakop kanila ang mga sundalo sa 47th IB.

Gidala sa Asturias Police Station ang mga dinakpan aron pasakaan og tukma’ng kaso. (BANAT NEWS)