Kapin sa P1M nga shabu nasakmit, pushers nadakpan

CEBU, Philippines – Ang mga sakop sa Cebu City Police Office (CCPO) intelligence branch nakasakmit na usab og daghang shabu nga gibana-banang mokantidad og kapin sa P1 ka milyon.

Nadakpan usab ang duha ka suspetsadong drug pusher nga sila si Jerry Delgado, 44, ulitawo ug maoy target sa kapolisan ingon man ang iyang kauban nga si Kent Bryan Atienza, 35, nga matud pa maoy sinaligan ni Delgado.

Ang buy-bust operation didto gihimo sa Sunset Drive Extension, Barangay Lahug ning dakbayan sa Sugbo kaniadtong Lunes sa hapon.

Si Supt. Romeo Santander, hepe sa City Intelligence Branch, nagkanayon nga tulo ka semana nila nga gipanid-an ang ilegal nga kalihokan ni Delgado usa sila mihimo og buy-bust operation.

Nakuha sa mga otoridad ang unom ka medium size ug usa ka dako’ng putos nga may sulod nga gituohang shabu nga mokantidad og P1.1 milyones.

Ang mga dinakpan wala motug-an kun kinsa ang tigsuplay kanila og shabu. Ang kapolisan nag-andam na sa kaso nga ilang ipasaka sa mga suspetsado.

Samtang ang  sakop sa Provincial Intelligence Branch (PIB) sa Cebu Provincial Police Office (CPPO) misikop ‘sab sa usa ka gidudahang tigpayuhot og ilegal nga drugas sa Barangay Pulpogan lungsod sa Consolacion kaniadtong Lunes sa kadlawon.

Ang dinakpan mao si Randy Casipong, 33, level 2 drug pusher nga nagpuyo sa maong dapit. Si PIB Deputy Chief Armando Labora miingon nga sagad sa mga suki ni Casipong mao ang mga habal-habal drayber sa maong lugar.

Gamit ang P200 nga buy-bust money nakapalit ang mga polis og usa ka pakete sa shabu. Human sa iyang pagkasikop, ang mga polis nakarekober pa og daghang shabu nga kantidad og P82 mil.

Nadakpan sab sa kapolisan sa Presinto 1 sa Mandaue City Police Office (MCPO) ang duha ka tawo nga naghupot og shabu didto sa Mantuyong, dakbayan sa Mandaue sa miaging kaadlawon.

Si PO1 Mar Villamonte miila sa mga nadakpan nga mao sila si Elviz Gomez, 36 ug Leonardo Pasigay, 40  anyos nga pulos nagpuyo sa maong dapit. – /RUB) (BANAT NEWS)