Away ni Sanchez, Garcia padayun sa eleksiyon

CEBU, Philippines - Hingpit nga mag-atbang sila si Kongresista Gwendolyn Garcia ug Bokal Grecilda Sanchez sa pagka-kongresista sa ikatulo’ng distrito sa eleksiyon sunod tuig. Si Sanchez ang gipili sa Liberal Party nga moatbang kang Garcia atol sa general assembly sa mga sakop sa partido sa ikatulo’ng distrito kagahapon.

Sa wala pa giproklamar si Sanchez, si Tuburan Mayor Democrito “Aljun” Diamante, ang presidente sa League of Municipalities in the Philippines-Cebu chapter, nipaila na kang Sanchez nga umaabot kongresista atol sa iya’ng welcome remarks. Sa wala pa usab gipaila ni Sanchez ang ila’ng mga sakop sa distrito, iya na nga gidawat ang pagpili kaniya sa LP.

“I submit to destiny’s call,” matud ni Sanchez.

Nahisgutan ni Sanchez ang gihimo’ng pagpanggukod ni Garcia sukad pa niadto’ng buhi pa ang iya’ng amahan nga si bise gobernador Gregorio Sanchez. Si Grecilda ang nipadayun sa kaso nga pagpanapaw sa gahum nga gipasaka sa iya’ng amahan batok ni Garcia nga niresulta sa pagkasuspenso og unom ka buwan sa kanhi gobernador niadto’ng 2013.

Ang mga Garcia ang gibasol usab ni Sanchez nga nasira ang ila’ng gidumala nga sibyaanan sa Bantay Radyo. Matud ni Sanchez nga humana ang tanan sama sa pagkasuspenso ni Garcia ug ang pagserbisyo na karon ang iya’ng gitutukan.

“I could have started this when my father was alive, I still remember him telling me pwede ba ka modagan for public office, karon nakaingon ko I would like to submit to destiny’s calling,” matud ni Sanchez.

Usa sa gitan-aw ni Sanchez nga bintaha batok ni Garcia mao ang pagkawala’y isyu niya ingon man kaso nga giatubang.

Si Davide sa iya’ng bahin niingon nga ang hiyas sa namatay nga bise gobernador nga iya’ng gikauban niadto’ng 2010 nga eleksiyon anaa sa anak.

“Panahon sa iya papa, victim sa pagpanglupig sa mga Garcia even now siya’y object sa harassment sa mga Garcia. She believes, siya pud kombinsido siya nga she is the right person to challenge Garcia sa third district,” matud ni Davide.  (BANAT NEWS)