Kawani sa lotto outlet gidakop kay nakadispalko
CEBU, Philippines - Gidakop sa kapolisan ug gibalhug sa bilanggoan ang usa ka teller sa lotto outlet sa Poblacion Oriental, Consolacion kay nakadispalko og P165 mil nga halin sa lotto tickets.
Si PO1 Socrates Borinaga sa Consolacion Police Station mitug-an nga si Raffy Jumadiao, 19 anyos, ulitawo ug lumad nga taga Tacloban, Leyte wala maka-remit sa mao nga kantidad.
Matud ni PO1 Borinaga nga ang tag-iya sa lotto outlet nga si May Reuyan Go nangayo’g tabang sa police station diha nga naabtan niya ang suspetsado nga nag-impake na sa iyang mga butang.
Si Jumadiao napakyas pag-remit sa kita kaniadtong Martes maoy hinungdan nga giimbintaryo sa tag-iya ang halin ug nasuta niya nga dunay kantidad nga kuwang base sa halin sa mga numero.
Ang narehestro nga halin sa lotto machine miabot og P200 mil apan miabot lang og P45,000 ang na-remit mao nga nakahukom siya nga ipadakop si Jumadiao. (BANAT NEWS)
- Latest
