Gipasayon ang “annulment” sa kaminyoon

CEBU, Philippines - Gihangop sa kadagkoan sa kaparian dinhi sa Sugbo ang lakang ni Santo Papa nga himoon nga sayon ang pag-andam sa mga panginahanglan alang sa panagbuwag sa magtiayon.

Si Monsenyor Joseph Tan, tigpamaba sa Archdiocese of Cebu, miingon nga usa ka maayo’ng desisyon ang gihimo sa Santo Papa kay kun aduna g’yuy basehanan sa panagbuwag sa magtiayon dili kini angay’ng langayon.

Sumala pa ni Tan, maayo kini nga balita kay dili na kaayo kinahanglan og taas nga panahon usa mapakawalay bili sa simbahan ang kaminyoon sa bana ug asawa.

Nasayran nga ang pag-asikaso sa papeles alang sa panagbuwag sa nagkasumpaki nga magtiayon moabot gani og lima ka tuig human sa paghusay.

Matud ni Tan, "gipasayon nato for those who are able to meet the conditions for annulment, wala nato gihimong sayon ang grounds for annulment, ang process for  annulment, the grounds are the same as ever in keeping with the teaching of the church from the beginning of the history until now.”

Gipasabot ni Tan nga bisan mubo na lang ang proseso karon sa annulment apan kun dili motukma sa basehanan dili gihapon ma-annul ang kasal. Kada tuig aduna la’y 10 ngadto sa 20 ka magtiayon nga magbuwag pinaagi sa simbahan, apan mas daghan ang adto modangop sa hukmanan. (BANAT NEWS)