Pagpabalhin sa CSBT gisaway

CEBU, Philippines – Giawhag ni Atty. Winston Garcia sila si Cebu City Mayor Michael Rama ug Cebu Gov. Hilario Davide III nga hunahunaon pagbalik ang plano nilang pagbalhin sa Cebu South Bus Terminal gikan sa kasamtangan niining lokasyon sa Natalio Bacalso Avenue, sa dakbayan sa Sugbo.

Si Garcia, sakop sa One Cebu Party miingon nga dili tungod kay walay daghang nisupak, wala kini nagpasabot nga uyon ang kinabag-an sa katawhan.

Matud pa ni Garcia, ang mga transport operators mipadayag nga bisan asa pa sila ibutang, mokita gihapon sila.

Apan ang iyang gikabalak-an mao ang mga yanong sumasakay kay madak-an sa gastos sa pletihan ug ang kahasol sa pagbalhin-balhin og kasakyan.

Gihimakak usab ni Garcia nga ang terminal maoy hinungdan sa problema sa trapiko sa maong dapit.

Nahibulong usab si Garcia sa tubag ni Davide nga daan na nilang naandan nga motubag lang og ‘tun-an una ang maong plano’ kay   misugot kini dayon sa sugyot ni Rama pagbalhin sa CSBT sa Minglanilla o sa Talisay City.

Gikasagmuyo usab niya nga ang gipanindot nga CSBT nga susama sa usa ka tugpahanan ang serbisyo sa panahon sa paglingkod kaniadto ni kanhi gobernador ug karon Kongresista Gwendolyn Garcia napunta lang sa wala, ug karon plano pa hinuon ni Davide nga ipadumala sa pribadong kompanya.

Ang terminal natukod niadtong 1992 pinaagi  sa pag-utang sa Kapitolyo sa Japan Internatioal Cooperation Agency, ug gipasa ang pagdumala nganha sa Kapitolyo pagka 1993. (BANAT NEWS)