Seguridad, traffic gitutokan sa Ironman
CEBU, Philippines - Kapin sa 1,500 ka security personnel ang ipakatap ni Senior Superintendent Armando Radoc, officer-in-charge sa Lapu-Lapu City Police Office atol sa Cobra Ironman 70.3 Philippines 2015 karong adlawa.
Gawas sa mga polis, adunay mga force multipliers sama sa barangay tanod, navy ug airport security personnel ang motabang sa pagbantay sa maong swim-bike-run race route nga apilan sa 2,600 ka mga atleta gikan sa nagkalain-laing lugar sa Pilipinas ug sa laing nasud.
Dugang ni Radoc, anaay sea ambulances ug medical teams sa rota nga magbantay.
Si Chief Frank Brazil, hepe sa City Traffic Management Systems nagkanayon nga sirad-an ang kalsada sugod alas-5 sa buntag ug gipahimangnoan nila ang mga moadto sa Lapu-Lapu nga magsakay na lang og ferry boat gikan sa Cebu City. Ang lane padung sa Lapu-Lapu City diha sa Marcelo Fernan Bridge dili paagian. Mahimo hinuon maagian ang Mandaue-Mactan bridge padung sa Sitio Sangi, Motumbo Road sa Barangay Pajo.
Sa laing bahin, gipahibalo sa pangulo sa Cebu City Traffic Office Atty. Rey Gealon nga adunay daghang ipakatap nga traffic enforcers sa Cebu City. Kagahapon gatosan ka railings ang ilang gipanaod aron di maglabanglabang ang mga tawo sa rota sa mga triathletes.
Alas-5 sa kaadlawon karong adlawa di na paagian sa mga motorista ang rota padung sa South Road Properties. (BANAT NEWS)
- Latest