Gidasmagan sa fast craft missing pa
CEBU, Philippines – Padayun pa’ng gipangita sa coast guard ang mananagat nga si Edgar Bazar nga taga Tangke, dakbayan sa Talisay kinsa nawagtang human nadasmagan sa Weesam Express niadto’ng Marso 27 sa alas 6 sa buntag.
Gikan sa Leyte ang fastcraft samtang si Bazar padulong managat sa may Lawis Ledge, ang lugar nga nalunuran sa MV St. Thomas Aquinas human gibanggaan sa MV Sulpicio Express Siete sa nilabay’ng tuig.
Matud ni Christopher Andrew Estrabon sa City Disaster Risk Reduction Management Office nga nakig-alayon na sila sa coast guard alang sa search and rescue sa mananagat.
Gipahibawo ni Estrabon sa Banat News nga may nakuha nga tipaka sa pumpboat ni Bazar sa area.
Samtang gipahibawo ni Cynthia Barrit, acting City Information Officer sa Talisay, nga nimando na si Mayor Johnny delos Reyes sa City Social Welfare and Development Office nga tabangan ang kabanay sa mananagat nga nagsalig ra sa kinitaan.
Nimando usab si delos Reyes sa mga tawo ug mga kauban ni Bazar nga mananagat nga tabangan sa pagpangita ang coast guard. – /GMR) (BANAT NEWS)
- Latest
