Dugang hagit sa 2015 atubangon ni Davide
CEBU, Philippines - Nagpaabot si Gob. Hilario Davide III sa dugang pa’ng mga hagit nga atubangon sa mosunod tuig 2015.
Si Davide nagpasalamat sa mga sakop sa Hunta Probinsiyal ug sa mga kawani sa Kapitolyo sa suporta hinungdan nga nagmalampuson ang tuig 2014. Matud sa gobernador nga daghan sila og naagian nga mga hagit sa 2014 apan nakalampus sila niini.
Mapasalamaton si Davide sa mga Sugboanon sa pagsalig sa iyang administrasyon.
Apan ang gobernador nagkanayon nga dili malikayan nga dunay mga wala kauyon sa iyang administrasyon nga mosaway ngadto kanila apan gipaningkamutan nila nga makahatag og kaayuhan sa katawhan.
Sunod tuig, gibutyag ni Davide nga usa sa iyang priorities ang pagpamalit og mga heavy equipment.
Padayunon usab niya ang pag-ayo ug rehabilitasyon sa mga karsada ug gilauma’ng makabukas o makatukod og laing karsada sa tuig 2015. Naglaum si Davide nga ang maong mga proyekto mapatuman sa first quarter sa sunod tuig. Dugang ni Davide nga padayunon ang programa sa panglawas, agrikultura ug uban pa’ng programa nga nasugdan na sa probinsiya. (Brenda D. Batuto/GMR)(BANAT NEWS)
- Latest
