Wanted, nagpatay sa tiguwang sikop

CEBU, Philippines - Nadakpan na sa kapolisan ang usa ka most wanted nga lalaki tungod sa kasong paghupot og ilegal nga drugas sa Jubay, Liloan alas 3 pasado ang takna sa hapon niadtong Huwebes.

Ang nadakpan mao si Jessie Suano, 24, may kapuyo ug kasamtangang nagpuyo sa sitio Dumpsite, Umapad, dakbayan sa Mandaue.

Si  Police Officer 2 Eric Pintoy sa Liloan Police Station miingon nga si Suano niadto pa’ng Hunyo 28, 2010  giluwatan og warrant of arrest ni Judge Silvestre Maamo sa dakbayan sa Mandaue.

Matud ni Pintoy nga nakamatikod ang akusado nga nalutsan og warrant of arrest hinungdan nga kalit kining nawagtang sa Jubay hangtud ilang nasayran nga nagpuyo kini sa dakbayan sa Mandaue.

Samtang nasikop na sa kapolisan kagahapong adlawa ang gitudlong suspek sa pagpatay sa usa ka 63-anyos nga lalaki sa Upper Malubog, Cebu City.

Ang suspek naila nga si Teodoro Gabunada, 52, samtang ang testigos sa krimen mao si Orlando Bontilao nga usa ka amang.

Sumala pa nga kauban ang amang sa dihang gihimo ni Gabunada ang pagpatay sa usa ka Demetrio Culisar nga nakit-ang duna’y samad sa ulo ug gitabonan og sako sulod sa iyang payag nga gipuy-an.

Matud pa nga ang amang pa ang gisugo sa pagtago sa iyang motorsiklo aron madudahan nga ang nagpatay sa tiguwang ang mikawat sab sa iyang motorsiklo.

Gituohan nga gihimo ni  Gabunada ang krimen human matud pa ang tiguwang ang nakakita ug nakahibawo sa tago nga relasyon tali ni Gabunada ug sa inahan sa amang nga kanhi trabahante sa usa ka farm sa buwak sa suspek sa maong lugar.

Gihimakak ni Gabunada ang pasangil lakip ang giingong relasyon niya tali sa inahan sa amang.

Hinuon gitug-an sa dinakpan nga andam niyang atubangon ang kaso aron sab malimpyo ug iyang madepensaan ang iyang kaugalingon sa korte.

Kasong murder ang ipasaka sa kapolisan batok sa suspek nga gitanggong na sa Cebu City Police Office detention cell. (Romeo T. Limpangog ug Jojo C. Ugdol)(BANAT NEWS)