Nanglugos sa anak naghikog

CEBU, Philippines - Duha ka mga piniriso nga pulos nag-atubang og kasong rape ang nangamatay sud sa prisohan sa Liloan  ug sa Cebu City Jail.

Sa Liloan, ang namatay human naghikog ang 49-anyos nga amahan nga giingong miunay og lugos sa iyang anak .

Matud pa migamit og telephone wire ang maong priso sa paghikot sa iyang liog sud sa pansayan sa Liloan detention cell.

Base sa imbestigasyon sa kapolisan nasuta nga nananghid kini sa guwardiya nga mangasilyas, apan nahibulong sila nga dugay kining nigawas hangtud nga naabot na lang ang panihapon niini nga gidala sa iyang asawa. Dihang gitawag wala motubag ang maong priso hinungdan nga gipugos pag-abli sa kapolisan ang kasilyas ug didto ilang nakita nga nagbitay na kini ug wala na maglihok pa.

Samtang sa Cebu City Jail, usa ka rape suspect gihapon ang napalgang patay na sa gihigdaan niini sa Cell no.7 kagahapon sa kaadlawon.

Ang namatay giilang si Virgillio Sabellano, 40, taga Basak Pardo, Cebu City. Nakugang na lang si Edwin Opima, usa sa mga inmate nga bugnaw na ang iyang kaubang priso ug bisan giunsa niya pagpukaw wa na kini momata pa.

Sumala pa sa imbestigador sa Homicide Section sa Cebu City Police Office SPO4 Alex Dacua nga sa ilang pasiunang imbestigasyon nasayran nga pipila na ka adlaw nagmulo si Sabellano nga sakit ang iyang dughan.

Ang duty jail guard nga si JO1 Christian Resollar dali nga mitabang kang Sabellano apan nakabsan gayod kini sa iyang kinabuhi. Wala pay nakita nga timailhang may foul play sa kamatayon niini apan magpadayon ang imbestigasyon sa kapolisan pagtino sa hinungdan niini. (/EIM)(BANAT NEWS)