Papa Gipatay Sa Anak
CEBU, Philippines - Patay ang usa ka amahan human giunay og dunggab sa iyahang kaugalingong anak diha sa sityo Suba, barangay Luray Dos, dakbayan sa Toledo kagahapon sa hapon.
Giila ang biktima nga si Vicente Iwayan, 58, samtang ang suspek nga anak sa biktima mao si Marneil Iwayan, 23, pulos residente sa nahisgutang lugar.
Base sa imbestigasyon ni SPO3 Praxilo Albiso sa Toledo City Police Station nga samtang natulog ang suspek kalit kining gipukaw sa biktima ug masuk-anon nga mikomprontase kaniya kay nawagtang ang kwarta niini nga P500. Apan gikatahong misangpot kini sa mainitong panaglalis ug wala makaagwanta ang anak mikuha kini og kutsilyo dayong dunggab sa iyang amahan sa onse ka higayon.
Daling gidala sa Toledo City Hospital ang biktima apan gideklarar kini sa mga doktor nga dead on arrival.
Samtang boluntaryong misurender ang suspek ug gitanggong na sa Toledo City detention cell ug gipasakaan og kaso sa iyang igsuon. (BANAT NEWS)
- Latest
