LTFRB moisyu’g special permit sa mga PUV atol sa semana santa

CEBU, Philippines - Ang Land Transportation Franchising and Regulatory Board (LTFRB) 7 mohatag og special permitsa mga sakyanan nga pasaheroan nga nagtinguha pagbiyahe gawas sa ilang rota panahon sa Semana Santa.

Si LTFRB-7 Regional Director Ahmed Cuizon miingon nga ang tumong sa paghatag og special permit lakip na sa mga PUJ mao ang paghatag og kasayon sa mga pasahero sa ilang pagbiyahe sa mga dapit nga nihit ang sakyanan.

Moabot lang og P300 ang mabayran alang sa special permit nga pagakuhaon sa mga drayber o operator sa buhatan sa LTFRB 7.

Higpit hinuon nga gipahinumdoman ni Cuizon ang mga drayber ug operator sa mga sakyanan nga pasaheroan nga ang special permit nga gihatag kanila wala kini magpasabot nga gitugotan na usab sila pag-pick up og pasahero nga nag-atang daplin sa karsada. Gitataw ni Cuizon nga bisan kun nagbaton na sila og special permit alang sa ilang pagbiyahegawas na sa ilang mga rota apan kinahanglan nga napuno na daan sa pasahero ang ilang sakyanan sailang paggikan kay dili man mahimo nga mopasakay sila og pasahero diha sa agianan.

Dugang nga kalihokan sa LTFRB 7 panahon sa Semana Santa mao ang paghimo og inspection sa mga sakyanan sa mga terminal aron pagsiguro nga luwas ang mga pasahero sa ilang pagbiyahe.

Mopasiugda usab og road side drug test ang LTFRB 7 sa mga drayber atol sa maong mga adlaw ug higpit usab nilang bantayan angnagbiyahe nga mga sakyanang pasaheroan aron kalikayan ang over loadingnga makamugna og aksidente. (BANAT NEWS)