Abangan sa mga stalls sa public markets sa Cebu City patas-an

CEBU, Philippines - Ang Office of the City Markets sa dakbayan sa Sugbo morekomendar ngadto sa konseho nga pausbawan ang abangan sa mga tindera nga adunay mga stalls diha sa kamerkadohan.

Matud ni City Administrator Raquel Arce nga kun maaprobahan ang iyang sugyot nga himoon na nga tag P5 ang abang sa matag metro-kwadrado nga luna sa merkado, sigurado siya nga ang Office of the City Markets makakolekta og P120 milyones sa usa ka tuig.

Ang Office of the City Markets gihatagan og P60 milyones nga tahas nga kolektahon sa tibuok tuig apan ang iyang aktwal koleksyon sa pagka karon miabot pa lang og kapin sa P34 milyones.

Si Arce nagkanayon nga ang laing rason sa pagminus sa ilang koleksyon mao ang pagkuha gikan kanila sa tahas pagpangolekta sa mga arkabala gikan sa mga sidewalk vendors.

Ang pagtangtang sa maong katungod nahimo dihang si kanhi City Treasurer Emma Villarete milingkod sa maong katungdanan kay matud ni Villarete ang aseras dili na kabahin sa merkado.

Apan si Arce mipasabot nga pagkakaron daghan sa mga naninda sa aseras nga wala na makolektahi og arkabala sa dakbayan ug masabot nga wala na hinoon makakolekta ang siyudad.

Mikonsulta na si Arce sa City Legal Office kun angay ba nga ipadayon niya ang pagpangolekta sa mga sidewalk vendors. Ang arkabala nga kolektahon tag P10 ug P20 depende sa gidak-on sa tindahan sa usa ka sidewalk vendor.

Ang statistics nga gipresentar ni Arce mao nga ang kita sa dakbayan gikan Enero ngadto sa Agosto nag-anam og kaminus kun itandi sa tuig 2011 ug 2012.

Nahibaw-an hinoon nga dunay kapin sa 300 ka stalls nga wala gyu’y migamit tungod kay nahimutang kini sa mga lugar nga mingaw ug maalkanse lang ang mga tindera.

Gitun-an nila ni Arce kun unsay maayong himoon niining maong mga stalls aron kapahimuslan sa dakbayan. (/EIM) (BANAT NEWS)