Filipinos are worth dying for!

Kini ang linya ni Benigno “Ninoy” Aquino, ang amahan ni kanhi Presidente Aquino ug bana usab ni kanhi Presidente Corazon Aquino.

Napatik kini sa karaan nga 500 piso bill nga gitawag kaniadto nga “nampiling” kay nanampiling man si Ninoy sa iyang hulagway nga anaa sa kuwarta nga papel.

Karong adlawa ang Ninoy Aquino Day diin gihandom ang sumad sa assassination o pagpatay kaniya.

Human sa daghang katuigan nga nilabay, may nakahinumdom pa ba kaha sa kagahapon diin usa ka higayon niana adunay usa ka Filipino nga wala mahadlok mamatay tungod sa iyang gugma sa isig niya ka Filipino?

Bisan nasayod na siya kon unsa ka dako sa peligro nga nagpaabot kaniya sa iyang pagbalik sa nasud, gibaliwala ra kini ni Ninoy kay alang kaniya ang mga Filipino bililhon nga pakamatyan.

Ang kamatayon ni Ninoy maoy nakapasilaob pagsamot sa kasuko sa katawhan, hangtud nga mibuto ug misangpot sa pagkabungkag ug pagkahugno sa kagamhanan sa pamilyang Marcos.

Apan karong panahona, mura’g nabaliwala naman ang diwa sa kamatayon ni Ninoy tungod kay nahikalimtan naman sa katawhan ang madulom nga kasaysayan dungan sa pagtulon pagbalik sa dugo sa kanhi diktador sa nasud.

Ang mga Marcos nakabalik na sa gahum ug posibleng makabalik pa sa Malacañang sa umaabot nga katuigan.

Dili kini layo nga posibilidad sanglit mihumot naman usab pagbalik ang bansagon nga kanhi gikasilagan ug gipanghimaraot sa katawhan.

Dili lang si Ninoy ang nakigbisog batok sa rehimeng Marcos, kon dili, ang mga Filipino nga nangita og kagawasan. Busa karong adlawa, dili lang Ninoy Aquino Day, kon dili, Filipino Day.