?3.4M shabu nasakmit sa drug bust
CEBU, Philippines — Mokabat sa 500 gramos nga gituohang shabu nga nagkantidad og ?3.4 milyon ang nasakmit sa kapulisan atol sa anti-drug operation nga gipahigayon sa Police Drug Enforcement Group Special Operations Unit 7 (PNP DEG SOU7) sa Sitio Ciwac, Barangay Bulacao, dakbayan sa Sugbo Martes sa Gabii.
Atol sa operasyon, nadakpan ang 45-anyos nga si Roy Pelayo Badayos, residente sa Barangay Bulacao nga duha ka bulang gipanid-an sa wala pa ang operasyon.
Base sa imbestigasyon, gikatahong makabaligya ang suspetsado og mokabat sa 500 gramos hangtod usa ka kilo nga shabu matag 10 ka adlaw.
Lakip sa mga lugar nga giila sa kapulisan nga gilihokan sa suspetsado sa iyang giingong ilegal nga negosyo ang Bulacao, Minglanilla, Jaclupan ug Pardo. Narekord usab nga kaniadto nang nadakpan ang suspetsado sa mga tuig 2013 hangtod 2024 tungod sa kalapasan sa Section 11 sa Republic Act 9165 o Comprehensive Dangerous Drugs Act of 2002.
Gisubay usab sa mga otoridad ang gikatahong koneksiyon sa suspetsado sa usa ka tawo nga giila sa alyas nga "Bricks," nga gikatahong napriso sa New Bilibid Prison sa Muntinlupa City. (BANAT NEWS)
- Latest
