Road rage sa Camputhaw giimbestigahan   

CEBU, Philippines — Giimbestigahan karon sa Cebu City Police Office (CCPO) ang viral road-rage incident nga nahitabo sa Escario Street, Barangay Kamputhaw, Cebu City, niadtong alas 8 sa gabii sa Domingo, Septiyembre 20, 2026.

Sumala sa CCPO, mitubag ang mga personnel sa Abellana Police Station 2 human makadawat og report bahin sa traffic altercation nga mikaylap sa social media.

Base sa inisyal nga report sa kapolisan, pickup ug motorsiklo ang nalambigit sa insidente. Gikatahong nagsugod ang panaglalis human misulay og overtake ang pickup sa motorsiklo.

Mikatap sa social media ang usa ka lalaki ug laing lalaki nga nagsul-ob helmet nga naglalis tunga-tunga sa dalan. Kalit lang nga ang usa nibunot og usa ka gituohang kutsilyo ug gigukod ang lalaking naka-helmet.

Makita sad nga gipusposan siya sa lalaki gamit ang helmet kinsa dali kaayong nidagan paglikay sa lalaking naghupot og  gituohang usa ka kutsilyo samtang ang ubang mga motorista nagsige og badlong ug nagsige og busina sa ilang sakyanan aron sila badlungon.

Hinuon, gikatahong nagkasabot ra ang duha ka habig nga husayon ang ilang panaglalis pinaagi sa amicable settlement sa Barangay Kamputhaw.

Apan bisan pa niini maghimo gihapon og imbestigasyon ang CCPO bahin sa insidente aron matino kung adunay paglapas sa balaod ang duha.

Matud ni Police Lt. Colonel Gerard Ace Pelare, deputy city director for operations sa CCPO gisusi nila karon ang posibleng kaso nga ilang ipasaka batok sa duha sama sa alarm and scandal ug uban pa.

Matud ni Pelare, gisusi ang maong video aron matino kung ang butang nga makita niini usa ba gyud ka kutsilyo.

Bisan og nagkasabot na ang duha ka habig, ang Land Transportation Office Region VII (LTO-7) mipagawas og show-cause order batok sa rehistradong tag-iya sa usa ka Mitsubishi Triton nga giingong nalambigit sa usa ka road-rage incident nga nakuhanan sa viral video.

Ang show-cause order, nga gipagawas kagahapono Septiyembre 21, 2026 ni LTO-7 Regional Director Wendel Dinglasan, basis a video nga gi-post sa Facebook page nga “Cebu Road Heroes” diin makita ang drayber sa sakyanan nga adunay plate number GBD8781 nga giingong naggunit og gituohang mahait nga hinagiban ug balik-balik nga misulay pagdunggab sa laing motorista.

Gimando ni Dinglasan ang rehistradong tag-iya ug gitudlong drayber nga motungha sa LTO-7 Operations Division sa N. Bacalso Ave., Cebu City, sulod sa lima ka adlaw gikan sa ilang pagkadawat sa order.

Gimandoan usab sila nga daan nga mosumiter og sinumpaang komento o eksplinasyon, lakip ang mga orihinal nga dokumento nga may kalabotan sa kaso ug mahimong makapamatuod batok sa mga alegasyon.

Matud ni Dinglasan, kinahanglan ipakita sa drayber ang rason nganong dili siya angay panubagon administratibo isip usa ka “improper person to operate a motor vehicle” ubos sa Section 27(a) sa Republic Act 4136, nga giamendar sa Batas Pambansa Blg. 398.

Gimandoan ang nalambigit nga drayber nga itugyan ang iyang driver’s license ngadto sa LTO-7 Operations Division ug gipaubos kini sa 90-adlaw nga preventive suspension samtang gibutang ang Mitsubishi Triton nga adunay plate number GBD8781 sa ‘alarm’ pending sa resulta sa imbestigasyon. (BANAT NEWS)