Saag nga bala gikan sa firing range?

CEBU, Philippines — Mga residente sa Barangay Canjulao sa Dakbayan sa Lapu-Lapu nireklamo bahin sa matud pa saag nga bala nga nakaigo na og pipila ka panimalay diha sa ilang dapit. Ang mga saag nga bala ilang gituohang gikan sa kasikbit nga firing range sa Naval Forces Central.

Sa report sa OnePH para sa One Balita Bai kagahapong adlawa, gikatahong dunay usa ka balay nga naigo sa saag nga bala nga nilusot sa ilang bintana ug nilapos padung sa kabinet ug bangko.

Si Rolly Cañete miingon nga hapit gyud maigo sa saag nga bala ang iyang 2-anyos nga anak nga natulog anang tungora.

“Kuyawan gyud mi diri. Sukad ato, kuyawan mi basin naa napud saag nga bala moabot. Na-trauma mi,” matud ni Cañete sa maong interbyu kaniya.

Laing panimalay sab ang naigo sa matud pa saag nga bala ug hapit maigo ang 16-anyos nga estudyanteng namahaw anang orasa kay naigo ang lamesang iyang gikan-an.

“Gisampay nako ako hinay-hinay didto. Nagpasalamat ko sa Ginoo kay nakaduko ko para maglubag. Diha na ang impact sa bala, diretso diri. Wala gyud ko naigo. Na-anghelan pa gyud ko sa Ginoo,” matud ni Lucelyn Nuñez sa mao gihapong interbyu sa News5 Visayas.

Ang mga residente nagduda nga ang bala gikan sa firing range sa Navforcen nga giuwang lang og paril gikan sa kabalayan.

Wala mohatag og pamahayag ang kadagkoan sa Navforcen sa dihang gisuwayan og kuha sa ilang habig.

Apan gikataho nakigkita sila kang Mayor Cindi Chan uban sa hepe sa kapolisan sa Lapu-Lapu City Police Office.

Sumala pa nga dunay mga nakuhang duha ka basiyo sa bala sa .9mm ug duha ka basiyo sa kalibre .38 ang narekober sa mga opisyal sa barangay ug gi-turnover na sa Lapu-Lapu City Police alang sa ballistic examination.

“We don’t want to wait nga nay maigo, maaksidente og stray bullets makaigo sa atong residents. Dapat unta dili padung sa mga residential ang ilang firing range, padung didto sa kay kadako anang ilang lugar,” matud ni Chan sa report sa News5.

Sa laing bahin, ang hepe sa LCPO nga si  Police Colonel Agosto Daskeo nibutyag nga nagkasabot na sila sa Navforcen nga hunongon lang una ang paggamit sa ilang firing range samtang naghimo og imbestigasyon.

Samtang wala pa nila kini nakompirmar kun gikan gyud sa firing range ang mga saag nga bala, si Daskeo niingon nga naay mga estorya silang nadawat nga kaning mga narekober nga saag nga bala nakuha atol nga dunay nag-firing sa firing range.

Apil sa gisusi kun kinsay angay manubag sa maong insidente.—  IBM BANAT NEWS