Pedestrian bridge sa SRP mahimo nang magamit sa publiko

CEBU, Philippines — Magamit na sa publiko ang pedestrian bridge nga nagsumpay sa City di Mare ug Il Corso sa South Road Properties (SRP), Dakbayan sa Sugbo.

Kagahapon, Marso 16, 2026 gipahigayon ang walkthrough sa pedestrian bridge nga gipangulohan ni Mayor Nestor Archival, Sr. uban nila ni Gwen Sala, deputy general manager sa City Di Mare ug Thesbe Alonzo vice president for external affairs sa Filinvest. cAng mga pedestrian bridge mahimo na kining magamit sugod sa alas 6:00 sa buntag hangtud alas 11:00 sa gabii samtang gihuman pa ang pipila ka minor works. Gilaoman nga mahuman ang tibuok proyekto sa kataposang semana sa Abril 2026 ug magpatuman na ang kinatibuk-ang operasyon ngadto sa 24 oras matag adlaw. Ang tulay gidisenyo aron mapalambo ang seguridad ug mas sayon na ang pagtabok sa mga pedestrian diha sa SRP diin gibutangan usab og ramp alang sa mogamit og bisikleta.

Gilaoman usab nga kong mahuman na ang maong tulay magamit na usab ang mga gibutang nga elevator alang sa persons with disabilities (PWDs) ug senior citizens.

Magpakatap usab og tawo nga maoy mobantay ug momentinar sa siguridad sa isig ka tumoy sa tulay aron masiguro ang kahimtang sa siguridad sa mga mogamit niini.

Gibutyag ni Archival nga naaghat siya sa paghangyo sa Filinvest nga ablihan ang maong pedestrian bridge human sa disgrasya nga nahitabo sa magtiayong senior citizens nga sila si Cecilia ug Salvador Geraldizo kinsa nakalas atol sa Valentine’s Day human kini naligsi sa usa ka truck samtang nitabok diha sa SRP.

Matud ni Archival nga kinahanglan nga mas palig-onon ang siguridad sa katawhan aron nga mamenosan ang disgrasya sa siyudad ug diliu sab makadugang sa kahuot sa dagan sa trapiko ang mga molabang nga mga pedestrian. (BANAT NEWS)