Driver’s license ma-renew na online

CEBU, Philippines — Mahimo na nga mag-renew sa ilang driver’s license online ang mga motorista human opisyal nga gilusad sa Land Transportation Office (LTO) ang Online Driver’s License Renewal System (ODLRS) pinaagi sa eGovPH mobile app niadtong Huwebes.

Matud ni LTO Chief, Assistant Secretary Atty. Vigor D. Mendoza II tinguha nilang mapadali ug mapasayon ang transaksyon sa mga kliyente bisan nga anaa ra sila sa ilang mga panimalay o opisina. 

Aron maka-avail niining digital transaction, ang kliyente sa LTO kinahanglang mag-download ug mag-install sa eGovPh app sa ilang mga cellphones nga anaa sa App Store ug Google Play.

Ang app magkinahanglan og security verification aron mapanalipdan ang ilang account. Sa higayon nga ma-install na ang eGovPh app ug andam nang gamiton.

Diha sa maong app adunay mga pisliton nga icons nga magsilbing giya kung unsaon ang pamaagi sa pag-renew online.

Matud pa ni Mendoza nga aron maseguro nga paspas ug walay hasol nga online application, mas maayo nga ang mga motorista mokuha una sa mosunod nga mga requirements nga i-upload atol sa online transaction process sama sa Telemedicine Medical Examination; Online Driver's Enhancement Program (ODEP); ug ang lima ka oras nga online education program.

Kun makompleto kini ug mapasa, pwede nang mobayad sa renewal fee pinaagi sa pagpili og payment gateway.

Si Mendoza miingon nga ang malampuson nga transaksyon nagpasabot nga ang driver’s license na-renew na, ug midugang nga ang Electronic Driver’s License awtomatik usab nga mamugna ug makita kini sa eGov App. Matud pa niya e-license balido sama sa physical card o license ID card.

Dugang pa niya nga ang mga motorista mahimong makapahimulos sa ilang gi-renew nga driver’s license pinaagi sa pagpili og courier provider ug booking para sa delivery, o pick-up pinaagi sa pagpili og district office duol sa ilang lugar.  IBM BANAT NEWS