Health card dili ipadayon ni Shimura sa 4th district

CEBU, Philippines — Dili na ipadayon ni congressman-elect Sun Shimura ang paghatag og health card aron makabenepisyo sa mga serbisyong panglawas sa ika-upat nga distrito.

Ang maong programa gipatuman karon ni Kongresista Janice Salimbangon nga gihulagway ni Shimura nga mamahimong magamit sa politika.

"What we need is a good health care facility. No need na sa card sa politiko", matud ni Shimura sa pakighinabi niini sa Banat News.

Ang serbisyong panglawas pinaagi sa pagpalambo sa mga health care facility maoy prayoridad ni Shimura sa iyang distrito.

Matud ni Shimura nga kinahanglan lang og certificate of indigency ug certificate nga botante sa distrito aron maka-avail sa health services.

Kabahin sa imprastraktura, matud ni Shimura nga ang iyang plano magbutang og factory sa distrito aron makahatag kini og trabaho sa mga residente.

Samtang sa edukasyon, ang pagpalapad pa sa mga Cebu Techonological University (CTU) campus maoy iyang giplano usab.

Sa iyang paglingkod, nagtinguha usab si Shimura nga malibkas na ang land classification sa Bantayan Island gikan sa wilderness ngadto sa alienable ug disposable nga mga property.

Si Shimura hingpit na nga nanumpa isip kongresista sa ika-upat nga distrito sa Probinsiya sa Sugbo.

Si Shimura nanumpa kang Judge Glenn Jumao-as sa Regional Trial Court sa Dakbayan sa Bogo kagahapon diin gikuyogan siya sa iyang asawa nga si Bokal Kerrie Shimura ug ilang mga anak.

Si Kerrie nanumpa usab pagka-bokal sa ika-upat nga distrito kang Jumao-as human nakadaog sa iyang ika-tulong termino pagka-board member.

Si Shimura kinsa outgoing-mayor sa Daanbantayan maoy nipildi kang outgoing- congresswoman Janice Salimbangon sa nilabay’ng eleksiyon.

Si Shimura nakakuha og kapin sa 27,000 nga boto samtang si Salimbangon nakakuha kini og sobra sa 19,000 votes ug si Sal Cariaga anaa sa 182 ang boto nga  nakuha. (BANAT NEWS)