Cebu Province adunay labing daghang botante nga PDL
CEBU, Philippines — Ang mga Person Deprived of Liberty (PDL) hatagan og kahigayonan nga makabotar sa eleksiyon karong May 12, 2025.
Matud ni Jail Superintendent Eric Relucio, hepe sa Regional Operations Division BJMP-7 nga adunay 17,896 ka PDL sa Central Visayas apan 4,474 lang niini nga anaa sa mga jail facility ang makahimo sa pagbotar.
Sa maong gidaghanon 4,062 niini mga lalaki samtang 422 ang mga babaye diin sila lang ang gitugotan nga makabotar base sa gipatuman nga proseso sa BJMP ug Comelec.
Gikataho nga adunay mga PDL ang makahimo sa pagbotar sa gawas diin aduna sila’y kamandoan gikan sa korte ug ubanan sila sa mga BJMP personnel.
Ang mga sakop sa Commission on Election (Comelec) moadminister sa mga jail facility.
Ang Cebu Province nga adunay 3,504 ka PDL nga botante maoy adunay labing daghan nga PDL nga botante sa Central Visayas, gisundan sa Negros Oriental nga adunay 656 ka botante nga PDL; Bohol nga adunay 303 nga botante ug Siquijor nga adunay 13 ka botante nga PDL.
Ang botasyon sa mga jail facility magsugod sa alas 7:00 sa buntag hangtud sa alas 2:00 sa hapon aron mahatagan usab og kahigayonan ang mga BJMP personnel nga makabotar
Ang BJMP nipaubos usab sa red alert niining panahona aron pagsiguro sa kahapsay ug kalinaw sa botasyon sulod sa mga jail facility. (Rowena D. Capistrano ug Decemay P. Padilla/BDB)
Charter Day bonus madawat liwas na sa eleksiyon–Garcia
Gikompirma ni Cebu City Mayor Raymond Alvin Garcia nga dako ang purohan nga liwas sa eleksiyon na gyud madawat sa mga empleyado sa City Hall ang P35,000 nga charter day bonus.
Matud ni Garcia nga posibleng madungan na kini og hatag sa mid-year bonus.
Si Garcia nagkanayon nga gipaningkamutan niya nga mahangyo ang Commission on Elections (Comelec) nga mahatagan og exemption sa election ban ang maong bonus apan hangtud karon wala pa siya makadawat og tubag mahitungod niini.
“Wala gyud, dawaton nalang nato ng inig human na lang gyud sa eleksiyon”, ni Garcia pa.
Gilaoman ni Garcia nga molugwayan pa sa mga empleyado ang ilang pailob apan gipaniguro niya nga makiangayon ang madawat sa matag empleyado bugti sa serbisyo nga gihatag niini sa lokal nga gobiyerno. BDB BANAT NEWS
- Latest















