Content creators gikasohan sa RHPU-7

CEBU, Philippines — Gipasakaan og kaso sa Regional Highway Patrol Unit (RHPU)-7 ang duha ka content creators gumikan sa paghimo og mga contents nga naghatag og peligro sa kadalanan sa Sugbo.

Niadtong buwan sa Marso nag-viral ang paukyab nga video sa vlogger nga si Boss LB  human nagpakaaron ingon kini nga snailman ug nagkamang-kamang tunga sa karsada sa Lungsod sa Consalacion ug nabalda niini ang dagan sa mga sakyanan og pila ka gutlo.

Gumikan kay ni-viral ang maong video sa social media nakaabot dayon kini sa atensiyon sa kapulisan ingon man sa kagamhanan sa Lungsod sa Consolacion.

Ang maong vlogger nangayo dayon og pasaylo ug niangkon sa sayop nga nahimo.

Paglabay sa pila ka adlaw, laing content creator ang nihimo og content nga nikatkat sa atop sa jeep ug nagsayaw-sayaw.

Ang maong vlogger mao si Boy Banat nga una na nga gipatawag sa RHPU-7 gumikan sa content niini nga nag costume og Son Goku ug naghimo og stunt sa Transcentral Highway.

Niadto sab kini sa buhatan sa RHPU-7 ug nangayo og pasaylo ug nisaad nga dili mausab. Apan ang pagtunga nila sa opisina sa RHPU-7 ilaha sab nga gi-video ug gihimo matud pang content.

Kini maoy rason nga nakadesisyon ang RHPU-7 nga dili na nila ipatawag ang tanang content creators nga makamugna og kasamok o disturbo sa trapiko , diretso nalang nila silang pasakaan og kaso.

"This is just a warning sa tanan as I have said saona nga mga interview dili na nato ipatawag kutob sa atong makita nga dunay violations nga nahimo so ang atoang imbestigador will just conduct investigation and if ever evidence warrants for a filing of a criminal offense so atong i-file ang kaso," sigon ni Police Colonel Wilbert Parilla, Regional Chief sa RHPU-7.

Ang duha pasakaan og kasong alarm and scandal ug unjust vexation.

Nagpadayon sab ang cyber monitoring sa RHPU-7 sa mga content creators nga naghimo og contents sa mga karsada nga delikado sa mga tawo.

Sigon ni Parilla paglikay kini nga dili mabutang sa risgo ang mga content creators ug ang publiko.   IBM BANAT NEWS