Tulo ka pusher sikop sa managlahing buy-bust operation

CEBU, Philippines — Usa ka house boy ug iyang kauban ang nadakpan sa kapolisan sa Dakbayan sa Talisay sa gihimo nga buy bust operation didto sa sitio Kalubihan, Barangay Poblacion niadtong Martes sa gabii.

Ang subject sa operasyon mao si Jocel Abay Abellana, 44 anyos nga nagpuyo sa maong dapit ug iyang kauban nga si Phil Jun Caballero Paires, 44 anyos nga taga Barangay Cansojong sa nahisgutang siyudad.

Gihimo sa kapolisan ang operasyon human makadawat og report kabahin sa kalihukan ni Abellana nga pagpamaligya og illegal nga drugas.

Nakuha gikan sa suspek ang gituhuang shabu nga nitimbang og 32.5 gramos nga gibana-bana nga mobalor og P221mil.

Ang duha ka dinakpan gibalhug sa bilangguan ug gikatakda nga pasakaan og kaso.

Samtang nasikop usab ang 35 anyos nga High Value Individual (HVI) nga pusher sa buy bust operation sa mga sakop sa City Intelligence Unit (CIU) sa Mandaue City Police Office (MCPO) sa Barangay Mantuyong, siyudad sa Mandaue niadtong Martes sa gabii, Mayo 13, 2024.

Ang buy bust operation gipangulohan ni Police Lieutenant Colonel Wilfredo Alarcon human makahipos og impormasyon ang kapolisan sa ilegal nga kalihokan sa maong dinakpan.

Nasakmit gikan sa dinakpan ang 25 gramo nga shabu nga nagkantidad og P170,00.     

Susma pa ni Alarcon nga ilang nasuta nga makaduha na ka higayon nga nadakpan ang suspek sa kaso gihapon sa pagpayuhot og illegal nga drugas.

Gitanggong karon sa holding facility sa MCPO ang maong dinakpan samtang giandam na ang kaso nga ipasaka batok niini. (BANAT NEWS)