Nag-ilog sa pagsawod og tubig niresulta sa pagpanunggab
CEBU, Philippines — Niresulta sa pagpanunggab ang panaglalis sa duha ka lalaki human kini nag-inilogay sa pagsawod og tubig diha sa Barangay Basdiot, Lungsod sa Moalboal niadtong Martes sa gabii.
Ang biktima mao si Paul Anthony Junad, hingkod ang panuigon adunay kapuyo, residente sa naasoy nga lugar samtang ang suspetsado mao si Junrey Gabales, hingkod usab ang panuigon, nagpuyo sa Barangay Tomonoy sa maong lungsod.
Base sa imbestigasyon sa Moalboal Police Station nga ang biktima ug suspetsado nagkalalis tungod kay giingong ni-overtake og linya ang suspek sa pagsawod og tubig hangtud nga nagsinukmaggay ang duha.
Sa ilang pagsinukmagay, nibunot og gunting ang suspetsado ug gidunggab ang biktima kinsa naigo kini sa tuo nga bukton.
Daling nisibat ang suspek human sa insidente samtang ang biktima gidala diha sa Badian District Hospital ug gibalhin kini sa Vincente Sotto Memorial Medical Center sa Dakbayan sa Sugbo.
Atol sa hot pursuit operation ang suspetsado boluntaryong nitahan sa iyang kaugalingon sa police station mga alas 9:00 sa gabii sa samang adlaw. Ang suspetsado gikatakdang pasakaan og frustrated homicide. (BANAT NEWS)
- Latest
