Mga mayor sa Metro Cebu nikondenar sa aksiyon sa LWUA
CEBU, Philippines — Gikondenar sa mga mayor sa Metro Cebu ang giingong unlawful actions nga gihimo sa opisyal sa Local Water Utilities Administrator nga si Atty. Jose Moises Salonga tungod sa pag-apil apil niini sa operasyon sa Metropolitan Cebu Water District (MCWD).
Matud sa mga mayor nga ang gihimo ni Salonga misinterpretation sa Presidential Decree No. 198.
Ang maong mga mayor gilangkuban nila ni Mandaue City Mayor Jonas Cortes, Lapu-Lapu City Mayor Ahong Chan, Talisay City Mayor Gerald Anthony “Samsam” Gullas, Jr., Cordova Mayor Cesar Suan, Consolacion Mayor Teresa Alegado, Liloan Mayor Aljew Frasco, ug Compostela Mayor Felijur Quiño.
Ang LWUA nitudlo kini kang Atty. John Dx Lapid isip OIC general manager sa MCWD apan si Lapid wala kini pasudla sa buhatan sa MCWD kagahapon sa unang adlaw unta niya isip acting general manager sa water district.
Si Gobernador Gwendolyn Garcia nagkanayon nga karon maoy dili panahon aron magkagubot sa MCWD hilabina nga dako ang giatubang nga problema sa tubig tungod sa El Niño.
Base sa manifesto sa mga mayor nipadayag kini og suporta sa liderato nila ni Chairman Jose Daluz III, ug board members nga sila si Miguelito Pato ug Jodelyn May Seneo ug General Manager Edgar Donoso.
Nasayran nga nitumaw ang tensiyon kagahapon dihang si Lapid wala kini pasudla sa buhatan sa MCWD.
Ang kasamtangang board nga gipangulohan ni Daluz III kauban ang mga board members nga sila si Seneo ug Pato niluwat og resolusyon nga nagpamatuod pag-usab sa ilang legal nga awtoridad isip Board of Directors (BOD) ug pinaagi niini nimando kang Donoso nga ipatuman ang lockdown sa MCWD.
Sa samang resolusyon nga giluwatan niadtong Abril 12, 2024, gimando usab nga ang mga sakop sa LWUA interim board ug si Lapid nga did-an sa pagsulod sa MCWD building.
Si Lapid maoy pangulo sa customer care sa MCWD sa wala pa kini matudlo isip OIC GM.
Si Daluz niawhag kang Lapid nga moluwat sa katungdanan aron ipakita ang decency. Matud ni Daluz nga ang pagdawat ni Lapid sa posisyon isip OIC usa ka insubordination sa iyang mga amo. (BANAT NEWS)
- Latest
