Cortes, upat ka konsehal gireklamo

CEBU, Philippines — Gipasakaan og kasong kriminal ang mayor sa dakbayan Mandaue apil na ang upat ka mga konsehal may labot sa 9.5 hectare property nga gipangapud-apod ngadto sa mga informal settlers, apan ang ownership giangkon sa usa ka pribadong indibidwal.

Kasong kalapasan sa Section 2 sa Republic Act (RA) 3019 kun Anti-Graft and Corrupt Practices Act ang gisang-at batok ni Mayor Jonas Cortes ug nila ni City Councilors Maline Zafra, Oscar Del Castillo, Jen Del Mar, ug Cynthia Remedio.

Ang maong reklamo gipasaka sa usa ka Maria Priscilla Melendres sa Office of the Ombudsman Samuel Reyes Martires sa Quezon City.

Misang-at sab si Melendres og reklamong “oppression, gross misconduct in office and grave abuse of authority” ngadto sa Office of the President.

Giawhag ni Melendres si Presidente Ferdinand Marcos Jr. nga imbestigaran ug “preventively suspend” ang mga opisyales sa Mandaue kay nabalaka kining maimpluwensiyahan ang mga testigo ug malawgaw ang mga ebidensiya.

Si Melendres nga residente sa Barangay Lahug, siyudad sa Sugbo nangangkon nga siya maoy tag-iya sa luna diha sa Barangay Paknaan, siyudad sa Mandaue nga giingong gigamit sa City Government isip relocation site sa mga informal settlers.

Gitataw ni Melendres nga ang maong luna iya sa iyahang apohan hangtod nga gibaligya kini sa iyaha.  Nagkanayon sab kini nga ang pagbalhin sa ownership kay giila sa siyudad base sa tax declaration nga narehistro ubos sa iyahang ngalan.

Midugang ang reklamante nga ang City Assessor’ Office miila kaniya isip “declared owner” base sa Real Property Tax Statement nga iyahang gi-file.

Mibayad sab matud pa si Melendres og new assessment fee sa luna nga nagkantidad og P100,291.50.

Nisang-at sab si Melendres og reklamong illegal entry batok ni Cortes kaniadto apan hangtud karon pending pa ang kaso sa Municipal Trial Court in Cities 2 sa Mandaue City.

Gitugtan sa kagamhanan sa siyudad  ang pipila ka mga informal settlers nga mo-okupar sa luna ug karon dili momenus sa 100 ka balay na ang natukod.

Nakadesisyon si Melendres nga mosang-at og reklamo batok kang Cortes ug sa upat ka mga konsehal sa Ombudsman dihang niadtong Marso 16 ang subdivided lots gi-award ngadto sa mga informal settlers.

Gisang-at niya ang reklamo upat ka adlaw human ang luna na-award sa mga informal settlers.

Matud pa ni Melendres nga si Cortes ug ang upat ka mga Konsehal “deliberately disregarded due process” dihang matod pa ilegal silang misulod sa property ug gi-award ang luna ngadto sa mga residente bisan og dunay pending ejectment case.

Gawas matud pa sa pagtugot sa mga informal settlers pagokupar sa luna  mireklamo sab si Melendres nga ang koral nga gibutang sa dapit kay giguba matud pa sa mga empleyado sa Mandaue City.

Sa pagkutlo ning maong balita gipaabot pa ang tubag ni Cortes. Apan si Konsehal Remedio nga nakontak sa Banat News nagdumili sa pagkomento sa kaso samtang si Del Mar miingon nga wala pa kini nakadawat sa kopya sa kaso.

Apan si Atty. Julius Caesar Entice, Assistant City Assessor sa siyudad miingon nga ang siyudad dunay katungod sa luna, matud niya walay pribadong indibidwal nga makapangangkon og luna nga gikonsiderar nga timberland. (BANAT NEWS)