Taiwanese gipadakop sa transwomen

CEBU, Philippines — Gipadakop sa duha ka transwomen ang usa ka Taiwanese national human nga ilang gipasanginlang mibun-og kanila diha sa usa ka motel diha sa Barangay Carreta, siyudad sa Sugbo niadtong Domingo, Abril 7.

Ang langyaw usa ka 32 anyos nga lalake samtang ang mga transwomen nga nangreklamo nag edad og 29 ug 27 anyos.  Giingong nagkaila ang tulo sa usa ka dating app niadtong Domingo, Abril 7.

Nagkita sab sila anang adlaw sa usa ka mall sa Barangay Mabolo ug nagkasabot nga mangadto og motel.  Didto sa motel giingong naay nahitabo nila apan wala pa matagbaw matod pa ang langyaw kay nangita pa kini og laing kauban kay giingong gusto niya makig threesome.  Hinungdan nga gitawagan ni alyas Yassi iyahang amiga nga si alyas Maricar.

Nahitabo gyud nga naghilawas ang tulo. Nanuktok matud pa ang roomboy kay naningil sa bayad sa extra person apan dihang nakailis na ang langyaw giingong niaksyon kini og dagan.

Gipungan nila kini ug giingnan nga mobayad apan giingong nasuko ang langyaw ug gihapak niya si alyas Maricar og cellphone nga iya ni alyas Yassi.

Nakuyapan ug nagkadugo matud pa ang nawong ni alyas Maricar tungod sa samad sa tabon-tabon sa iyang mata.  Gikumot sab matod pa sa langyaw ang buhok ni alyas Yassi kinsa mibawos sab pinaaga sa pagkambras.

Nigawas matud pa ang langyaw apan gumikan sa karatol niini natumba kini hinungdan nga nabun-og ang lawas.

Apan lahi sab ang pasangil sa langyaw, kini mipasangil nga gitukmod siya sa duha transwomen sa hagdanan nga hugot nga gipanghimakak sa duha.  Gihikamakak sab nila ang pasangil makighusay lang sila bugti sa P1,000,000.

Midugang ang duha nga gisaaran sila nga bayran og P10,000 kada usa. Ang maong langyaw naa sa Sugbo kay nagbakasyon, niabot kini niadtong Marso 30 ug mouli sa Martes, Abril 9.

Subay sa maong hitabo si Police Lieutenant Colonel Janette Rafter, Deputy City Director for Operations sa Cebu City Police Office (CCPO) miingon nga imbestigaran nila ang maong ilabi na nga managlahi og pamahayag ang duha ka habig.

“We are not on that we still have to conduct also our own investigation kay basin og naa puy unsa gyud ka tinud-an sa panghitabo didto panahona, we will be conducting investigation,” sigon ni Lt. Col. Rafter. (BANAT NEWS)