Target completion sa Phase 1 sa BRT hayan dili matuman
CEBU, Philippines — Bisan pa sa panaglalis nila ni Cebu City Mayor Michael Rama ug ni Cebu Provincial Governor Gwendolyn Garcia sa pagtukod sa bus station isip kabahin sa Cebu Bus Rapid Transit (CBRT), si Project Manager Engineer Norvin Imbong nipasalig nga magpadayon ang pagtukod sa ubang parte sa proyekto.
Sa pakighinabi sa mga tigbalita kagahapon (Lunes), si Imbong miingon nga ang managlahi nga mga opinyon tali sa mga lokal nga lider posibleng maoy hinungdan nga malangay ang pagkompleto sa phase 1. Suma pa ni Imbong nga human gipahunong ni Gov. Garcia ang pagtrabaho sa bus station atubangan sa Capitol building ila kining gitahud ug gipunting ang pagtrabaho sa may South Bus Terminal.
“Kanang pag mobilize sa mga equipment nga gigamit didto sa Capitol, kana sya makadala na sya… as what I have said, kung delay, delayed na na sya, mao na nga hopefully nga ma settle dayon, aron di mudako na ba,” matod pa ni Imbong.
Gikataho nga ang target completion date sa CBRT Package 1 karong Hulyo 2024 ug giangkon ni Imbong nga dili siya sigurado kun matuman ba kini.
Samtang gitug-an ni Imbong nga sa ilang pagpresintar sa design ngadto sa Cultural and Historical Affairs (CHAO) niadtong 2020 wala sila gipahibalo sa pagkuha og clearance.
Dugang niya nga gipahibawo lang sila sa mga requirements sama sa dili pag-obstruct ug dili mag-renovate sa usa ka historical site.
“Ang nahitabo sa among hunahuna pag present namo sa CHAO kung naa ba gyud mi violation, so gipangayoan unta mi og unsa na (requirements) wala man gud, ang ilang gi mention ra jud, dili mu guba, dili mu renovate,” suma pa ni Imbong
Hinuon gidugang niya nga tungod kay gimandoan sila sa pagtuman sa mga historical requirements dili pa sila makapadayon sa pagtukod sa estasyon sa bus ug sila naglaum nga mapadali ang pagtuki sa maong isyu. (BANAT NEWS)
- Latest
