Lalaki nga nangawat sa boarding house nailhan na

CEBU, Philippines — Nailhan na sa Cebu City Police Office (CCPO) ang lalaki nga nangawat sa usa ka boarding house diha sa Sitio Upper Don Bosco, Barangay Apas, Siyudad sa Sugbo niadtong Martes sa kadlawon.

Sayo pa, gi-post diha sa Facebook page sa Barangay Apas-Office of the Barangay Captain ang footage sa closed-circuit television sa pagsulod sa maong kawatan sa kwarto ug nisakiyo sa alahas, cellphone ug kwarta sa biktima.

Matud ni Police Lieutenant Colonel Janette Rafter, deputy city director for operations sa Cebu City Police Office (CCPO) nga gipangita na nila karon ang maong lalaki.

Giingong taga Barangay Apas ra ang maong kawatan.

Samtang ang kabahin sa nahitabong pagpangawat gahapon diha sa Banawa, Barangay Guadalupe sa niaging adlaw diin ang mga kawatan nakakuha og upat ka cellphone base sa post ni Cebu City Councilor Joel Garganera, si Rafter nagkanayon nga gisubay na usab nila kini human sila nakadawat og impormasyon.

Nanawagan ang kapolisan sa publiko nga kong adunay kasayoran sa mga tawo nga nangawat dili magduha-duha sa paghatag og impormasyon sa kapolisan aron kini madakpan. (BANAT NEWS)