Mga kawani sa barangay gibansay aron motaas ang ilang pasensya

CEBU, Philippines — Gisugdan sa Talisay City Disaster Risk Reduction and Management Office (TCDRRMO) ang pagbansay sa mga kawani sa barangay sa pagpataas sa ilang pasensya sa pagdumala sa mga evacuation center.

Kini ilabi na kay di malikayan ang mga panghitabo sama sa sunog o katalagman diin aduna gyud silay atimanon nga mga pamilya nga mahimong biktima sa kalamidad.

Si Janice Sisa, training head sa TCDRRMO nibutyag nga gihimo nila nga pilot barangay ang Biasong.

Ila dayong gihimo ang pag atubang sa mga bata nga nangita og inahan, adunay mga tawo nga nalisang ug nakasinati og taas nga blood pressure, mabdos ug uban pa diha sa evacuation center.

Ang mga scenario gipakita sama sa nahitabo nga sunog o bisan unsa nga katalagman.

Ang Talisay nakasugat na og tulo ka dagkong sunog ning tuiga diin ang matag barangay niatubang sab sa susama nga scenario sa mga apektadong pamilya.

Si Sisa nipasabot sa training nga inaton gyud ang tanang pasensya sa mga kawani sa barangay hasta na ang mga opisyales.

Karong buwan sa Hulyo saulogon ang disaster resiliency month ug sila naningkamot nga mapaubos na sa training ang 22 ka barangay sa Talisay. (BANAT NEWS)