P12 milyon sa naga gipangita sa COA

CEBU, Philippines — Moabot sa P12 milyones ka pesos nga panudlanan sa Syudad sa Naga ang nadiskubrehan sa Commission on Audit (COA) report nga nahanaw.

Tungod niini, gi-hold matud pa sa kapolisan sa maong siyudad ang 44-anyos nga babayeng liquidating officer sa maong siyudad niadtong Lunes sa alas-6 sa gabii.

Si Police Lt. Col. William Homoc, pangu sa Naga City Police Station niingon nga ang giingon nga ilegal nga kalihukan nagsugod niadtong tuig 2022.

Ang trabaho sa gipasanginlan mao ang paghipos sa koleksyon sa siyudad ug siya sab ang gitugyanan sa pag-deposito niini ngadto sa bangko.

Apan sa report sa COA wala na masubay ang mga dokumento kung asa napaingon ang salapi sa gobiyerno nga mao sab ang nakapaalarma sa ilang ang City Treasurer.

Si Homoc nibutyag nga daghan ang nakaobserbar sa ilang nakustodiya nga nausab sab ang lifestyle niini, apan duna pay dugang mga imbestigasyon nga gihimo aron pagprubar niini.

Apan apil sa matud pa ilang nasayran nga nagsige na kini og larga sa abroad ug regular sab kining mogsuroy sa dakong mall sa South Road Properties (SRP).

Si Mayor Valdemar Chiong nipadayag sa iyang kasubo sa panghitabo ug naalarma tungod kay panudlanan sa siyudad ang nawad-an og salapi.

Hinuon iyang gisalig ang tanan sa buhatan sa COA aron masubay gyud ang tanan. Gipasalig hinuon ni Chiong nga samtang nagpadayon ang COA sa pagsubay sa mga ebidensya dili maapektahan ang ilang operasyon  ug serbisyo sa siyudad.

Sigon pa ni Homoc nga magpaabot sila kun ang siyudad o ang COA mopasaka og kaso batok sa maong babaye nga naa karon sa ilang kustodiya.

Ang mao nga babaye dihang gikuhaan og pamahayag bahin sa nahanaw nga P12 milyones, nagdumili sa pag-atubang sa mga tigbalita.—   IBM BANAT NEWS