Mandaue City Hall, Mandaue City Central School nakadawat og bomb threat
CEBU, Philippines — Ang Mandaue City Central School ug Mandaue City Hall nakadawat og bomb threats kagahapong adlawa sumala pa ni Police Lt. Col. Mercy Villaro, ang tigpamaba sa Mandaue City Police Office.
Matud pa ni Villaro, ang tulonghaan ug city hall nakadawat og email nga nagpahibalo nga adlaw nga Huwebes Pebrero 15 sa ala 1:34 sa hapon, adunay major public school ug major government public facility nga pabuthon.
Pero wala gibutyag kung asa nga dapit o siyudad, hinungdan ang CDRRMO nakig-alayon kini sa kapolisan.
Ang eskwelahan pagkakuha sa maong impormasyn nisuspenso gilayon sa klase sa mga estudyante samtang ang CDRRMO nagpakatap na usab sa ilang mga tawo ug samtang ang kapolisan nagpadala og bomb disposal teams.
Ang MCPO naghimo na og imbestigasyon kabahin niini. Apan sa inisyal nga pagsusi, nakita nga ang maong suwat niagi makadaghan og editing o giusab-usab.
Matud pa ang unod sa maong suwat gigamit na sab sa pagpadala og bomb threats sa nanglabay nga mga adlaw ning buwana.
Kahinumdoman nga sayo ning semanaha, unom ka departamento sa gobiyerno ug mga publikong tunghaan ang nakadawat og bomb threats pinaagi sa email gikan sa nagpailang usa Hapon nga abogado. Apil sa nakadawat og hulga adto adlawa ang Cebu City Palace of Justice.
Nakig-alayon na karon ang MCPO sa PRO-7 bahin niini. (BANAT NEWS)
- Latest
