Mga patigayon sa Mandaue City nagtigum alang sa ilang seguridad
CEBU, Philippines — Dili mominos sa 18 ka mga representante gikan sa mga nagkadaiyang patigayon sama sa malls, supermarkets ug grocery stores ang nitambong sa panagtigum tali sa ilang security managers nga gipatawag sa Mandaue City Police Office kagahapon sa buntag sa adlaw nga Huwebes.
Matud pa sa tigpamaba sa MCPO nga si Police Lt. Colonel Mercy Villaro nga gihimo nila kini aron pagpangita og pamaagi nga palig-unon ilang seguridad gikan sa tanang mga hulga.
Apil niini ang kabahin sa mga kaso sa tulis, kawat, shoplifting ug uban pa. Gitan-aw sab kun unsay ilang mga gipanghimo aron pagpakgang niini ug kung duna na ba silay mga nadakpan ug napangkasohan.
Gawas sa maong sektor, plano sab ipatawag para sa samang tigum ang mga representante sab sa financial institutions, homeowners ug uban pa. Kabahin kini sa paghatag og impormasyon sa komunidad kabahin sa kahimtang sa seguridad sa ilang mga negosyo.
Gawas pa niini, buot sab sa MCPO nga magtinabangay ang tanang patigayon paghatag og ideya sa usa’g-usa kun unsa ilang mga gihimong epektibong pamaagi aron batokan kining maong mga hulga.
Gihulagway ni Villaro nga usa ka mabungahon ang maong tigum tungod daghan silang nakat-onan ug natampo alang sa pagpalambo pa sa ilang seguridad. (BANAT NEWS)
- Latest
