Gealon tinguha nga masusi ang wa mahuman nga road project

CEBU, Philippines — Usa ka executive session ang gipatawag aron mahatagan og katin-awan ang wala pa mahuman nga proyekto sa karsada sa may Jacosalem Street nga karon naghatag og peligro sa mga motorista ug nagpahimong “hazardous" sa maong dalan.

Mao kini ang resolusyon ni Cebu City Councilor Rey Gealon nga iyang gisang-at ngadto sa Cebu City Council kagahapon (Miyerkules), atol sa regular session.

Matud ni Gealon, naabot sa ilang atensyon nga adunay wala mahuman nga road project sa may bahin sa Jacosalem Street.

Segun sa taho nga adunay kinalot nga mga parte nga gibutang sa daplin sa karsada samtang adunay pipila ka mga buslot nga temporaryong gitabonan og steel plates.

Dugang pa niya nga tungod sa wala pa mahuman nga proyekto sa karsada, naglisod ang mga motorista sa pag-agi niining dapita hinungdan nga naghuot ang nahisgutang lugar ug uban pang mga karsada nga niresulta sa huot nga trapiko.

Tungod niini, gipahayag ni Gealon nga kinahanglan magpahigayon og usa ka executive session aron mahatagan og kahayag ug mapresentar ang mga update sa nahisgutang proyekto.

 Dugang pa niya nga kinahanglang mahibaw-an usab sa konseho sa dakbayan sa Sugbo ang bisan unsang rason o kahimtang kalabot sa pagkalangan sa proyekto.

"The City Council also needs to be apprised of the safety measures put in place by the contractor to prevent or minimize road accidents," sigun pa ni Gealon.

Subay niini, si Gealon nangayo og pagtugot sa konseho nga imbitahon ang mga representante gikan sa Department of Public Works and Highways (DPWH, Department of Engineering and Public Work (DEPW), ang kontraktor sa road project, Cebu City Technical Infrastructure Committee, ang Barangay Kapitan sa Barangay Zapatera, ug Cebu City Transportation Office (CCTO) aron matubag ang mga kabalaka kalabot sa maong proyekto. (BANAT NEWS)