2 babaye nakuhaag 1 kilong shabu  

CEBU, Philippines — Sikop ang duha ka babaye nga giingong namaligya og illegal nga drugas sa gihimong buy-bust operation sa Mambaling Police Station 11 sa Sitio Puntod, Barangay Mambaling, siyudad sa  Sugbo Biyernes sa kaadlawon.

Ang mga dinakpan mao sila si Judith  Verdezola Dignos alyas Judith, 43,  residente sa Mahayahay 2, Barangay Calamba ug si Victoria Empalmado Aida alyas Becky, 50,  pulos wala'y trabaho ug nagpuyo sa Sitio Cadasig, Barangay Tisa, sa Cebu City.

Ang mga dinakpan nakuhaan og 1,017 gramong  gituohang shabu nga mobalor og P6.9 million nga illegal nga drugas. Si Judith mao ang subject sa buy-bust operation.

Matud ni Police Lt. Col. Janette Rafter, Deputy City Director for Operations sa Cebu City Police Office(CCPO) nga si Judith nadakpan niadtong 2017, nakagawas human sa dul-an upat ka tuig.

Apan mibalik kini sa illegal nga kalihukan gani ang pagkasikop niya kagahapon ang iyang ikatulong transaksiyon.

"HVI gyud ni siya, dako na gyud ni siya kay according pa gyud sa atong pagsukit-sukit niya anaa na pud siya'y mga tawo nga iyahang murag disposer niya, naa na siya'y mga downline, so kung wala ni siya na nadakpan karon naay possibility nga modako pa gyud ni siya kay sa illegal drugs man gud dili ka hatagan og ingon ana ka dako, ingon ana gyud at once kung dili siya sinaligan," sigon ni  Rafter.

Nahibaw-an sab sa kapulisan nga maka dispose ang mga dinakpan og 500 ngadto sa 700 gramong shabu kada semana. Ang mga kaniadto koneksiyon niya kauban niya sa prisuhan sa dihang nabilanggo pa kini ang nagpaluyo sa iyang modus pagsuplay og shabu sa Cebu City.

Pasakaan og kasong kalapasan sa Section 5 ug 11 , Article II sa Republic Act 9165 ang mga suspetsado.

Gihugtan sa kapulisan ang pagkuyanap sa illegal nga drugas karon nga nagsugod na ang kalihukan may labot sa Pasko ug diretso na kini sa Sinulog Festival sa bulan sa Enero sunod tuig.

Samtang laing High Value Individual  (HVI) ang nadakpan sa mga sakop sa Municipal Drug Enforcement Unit (MDEU) sa Liloan Police Station sa buy bust operation nga gipahigayon sa Sitio Tabok, Barangay Lamac  sa Yati, Lungsod sa Liloan sa miaging Huwebes sa gabii.

Ang nadakpan giila nga mao  si   Donlad Palermo  Tulo  Jr.,  molupyo  sa maong dapit nga nakuhaan  og gituohang shabu nga nagkantidad og P40 mil.

Ang mga dinakpan kasamtangan nga gitanggong sa holding facilities sa kapolisan ug gikatakdang pasakaan og kasong kalapasan  sa Section 5  ubos sa Article 2  sa Republic Act  9165 o Comprehensive Dangerous Act  of 2002 — IBM (BANATNEWS)