Bag-ong hepe sa HPG motutok sa ulahing modus sa carnapping

CEBU, Philippines — Aduna nay giandam nga mga programa ang bag-ong nilingkod nga hepe sa Highway Patrol Group (HPG)-7 nga si Police Lieutenant Colonel Wilbert Parilla.

Si Parilla niasumir sa katungdanan niadtong Nobiyembre 30, 2023 diin iyang gihulipan ang kanhi hepe nga si Police Colonel Neil Francia kisan gibalhin ngadto sa HPG national capital region.

Nasayran nga sa paglingkod ni Parilla sa katungdanan tutokan niya ang bag-ong modus sa carnapping nga mao ang Labas Casa, Rent Tangay ug Assume Balance diin ang giingong mga nalambigit niini mga car dealer ug anaa sa bangko.

Usa sa mga gisubay nga kaso sa HPG Manila mao ang Labas Casa diin kasagaran sa mga nabiktima mga magtutudlo giingong ang modus niini gamiton ang pangalan sa mga magtutudlo aron maka-loan sa bangko og sakyanan.

“Ang gikuha lang ID of the teachers nga maestra sila pero ang mga supporting documents is fake, inig gawas sa sakyanan ang kato nang sindikato ang magkupot kay nagpirma naman daan og open deed of sales or SPA ang teachers nga nag-loan, sila nay modala”, matud ni Parilla.

Nasayran nga adunay duha ka sakyanan nga biktima sa Labas Casa nga modus ang na-monitor sa HPG nga anaa karon sa Sugbo

Si Parilla miyembro sa Philippine National Police Academy Sinaglaya Class of 2002, nahimo kining deputy city director for operations sa Cebu City Police Office (CCPO) ug nabalhin sa HPG National headquarters sa niaging tulo ka buwan. (BANAT NEWS)