Pagsiaw sa mga kawatan ug tulisan gipangandaman

CEBU, Philippines — Gipangandaman sa kapolisan sa dakbayan sa Talisay ang pagsiaw sa mga kawatan ug tulisan nonot sa pagsaulog sa holiday season.

Subay niini gisusi na karon sa kapolisan ang record sa mga kawatan ug tulisan nonot sa gilauman nga pagsiaw sa maong mga badlongon sa katilingban.

Si Police Lt. Col. Wayne Magbanua, hepe sa kapolisan sa Talisay nitataw nga tulo ka team sa Special Weapons and Tactics (SWAT) ang iyang gipapuli-puli nga magbadhas sa kadalanan. Lakip sa ilang gihimo mao ang pagpaniid sa mga dayo o mga bag-ong tawo nga motumaw diha sa siyudad.

Niadtong miaging adlaw, kawat ug tulis ang ilang natala apan ang mga suspek pulos kini nasikop.

Gimonitor usab ang mga tindahan o si bisan kinsa nga tawo nga modawat ug mga butang nga kinawat. — /MEL (BANAT NEWS)