Mga gangs sa Bogo subling nisiaw
CEBU, Philippines — Gasige og monitor ang Bogo City Police Station aning gang o grupo sa mga batan-on human nakadawat na sab sila og reports nga matod pa nibalik na sab sila og tapok-tapok ug nagbikil sa mga karibal nga grupo.
Una niini, niadtong Oktubre 7, 2023 sa alas 11:30 sa gabii dunay nahitabong pagpanunggab sa Purok Labayan, Barangya Nailon sa maong dakbayan.
Ang mga biktima nag-edad og 16 anyos ug 26 anyos nga pulos ra sab residente sa naasoy nga lugar.
Sa imbestigasyon sa kapulisan ang mga biktima miadto og diskohan sa covered court sa Barangay Nailon ug dihang migawas sila aron mamauli dunay grupo sa mga batan-on nga nisunod nila ug sa wala’y igong rason, usa sa mga nagsunod ang midunggab sa mga biktima.
Ang 26 anyos nga biktima nakaangkon og samad sa likod samtang ang menor de edad nadunggaban sa tuo nga bahin sa dughan.
Matud pa sa mga biktima nga miyembro sa Bloods nga gang ang mga suspek. Ang kapolisan nisusi na sa maong impormasyon sanglit ang maong gang nalambigit na sab og pipila ka krimen ug kagubot sa dakbayan sa nanglabay nga mga buwan. Nanawagan ang Bogo City Police Station pinangulohan ni Lt. Col. Joan Arnoco sa mga ginikanan nga monitoron ang kalihukan sa ilang mga anak.
Nagkanayon sab si Arnoco nga kanunay ilahang dayalogo sa mga tunghaan ug sa mga barangay aron pag-edukar sa ilang mga tinun-an ug kabataan sa dautang epekto ug mahitabo kun moapil og gang ang mga bata. (BANAT NEWS)
- Latest
