Katol gituhuang hinungdan sa sunog sa Velpal Subdivision
CEBU, Philippines — Gituhuang nagsugod sa katol ang miulbo nga sunog sa Velpal Subdivision, Barangay Pakigne, lungsod sa Minglanilla kagahapon sa kadlawon.
Suma pa ni FO2 Wilmar Alicante sa Minglanilla Fire Station nga nadawat nila ang alarma mga alas 5 pasado sa kadlawon.
Gisuwayan sa mga residente sa pagpawong ang kayo gamit ang fire extinguisher apan wala na kini matabang og naugdaw ang usa ka panimay nga gipanag-iya ni Felix Garcia Jr. usa ka taxi driver.
Nilampos usab ang mga bombero nga daling niresponde sa pagpawong gilayon sa kayo hinungdan nga wala na kini makakatap sa ubang mga panimay ug naka-an lang ang atop sa silingan nga balay.
Sa pasiunang imbestigasyon sa kabomberohan nasuta nga adunay katol nga duol sa kutson nga gituhuan nga nasaghiran ug maoy hinungdan sa pag-ulbo sa kayo.
Sa pagsuwat ning balita wala pa masuta sa kabomberohan ang danyos sa maong sunog. (BANAT NEWS)
- Latest
