Marcos gidapit sa groundbreaking sa skyway Lapu-Lapu

CEBU, Philippines — Gidapit sa kagamhanan sa Siyudad sa Lapu-Lapu si Presidente Ferdinand “Bongbong” Marcos alang sa pagtambong sa ground breaking ceremony sa Lapu-Lapu Expressway (LLEX) nga gikatakda sa September 8, 2023.

Sa pagkakaron nagpaabot na lang ang kagamhanan sa siyudad sa tubag sa suwat nga ilang gipada ngadto sa presidente kabahin sa ilang imbetasyon.

Ang maong proyekto nga nagkantidad og P24.8 billion maoy labing una dinhi sa Visayas ug Mindanao nga paga ugmaron ubos sa private-public partnership scheme.

Ang 12 ka kilometro nga expressway namugna pinaagi sa pagpaningkamot sa LLEX Corporation, nga consortium usab sa Premium Megastructure Inc. (PMI), MTD Philippines, ug ingon man sa Ulticon Builders Inc.

Kining 4-lane skyway maoy mo connect sa Cebu-Cordova Link Expressway (CCLEX) nga natapos sa Barangay Gabi, Cordova ngadto sa Mactan-Cebu International Airport (MCIA) sa Lapu-Lapu City.

Samtang giklaro sa mayor nga way magasto ang dakbayan sa maong proyekto tungod kay gi agi kini sa PPP (Public-Private Partnership), ug ang siyudad adunay bahin sa ilang toll fees.

Ang Skyway dumalahon sa LLEX Corp. sulod sa 35 ka tuig apan mahimo kining ma renew sa laing 15 ka tuig.  MEL (BANATNEWS)