Daghang negosyo gibuksan sa siyudad sa Mandaue — Cortes

CEBU, Philippines — “The city is in the pink of economic health,” mao kini gipadayag ni Mandaue City mayor Jonas Cortes atol sa iyang State of the City Address kun SOCA kagahapon diha sa City Sports and Cultural Complex nga gitambongan kadaghanan sa mga City Hall employees.

Suma pa ni mayor Jonas nga namatikdan nga midaghan ang gibuksan nga negosyo sa Mandaue nga nagpakita lang sa dakong pagsalig sa mga negosyante sa kagamhanan.

“This increase validates that business confidence remains strong as more companies register in Mandaue,” suma pa ni mayor Cortes.

Base sa natala sa Business Registration sa dakbayan nasuta nga sa tuig 2022 adunay 16,845 ka mga negosyo sa Mandaue City apan sa tunga-tunga niining tuig 2023 adunay 16 mil 278 ka negosyo na ang narehisto. Gumikan niini gipasalig sa mayor nga dugang programa og proyekto ang mapaabot sa mga Mandauehanon. Subay niini nalantawan nga daghan sa mga Mandauehanon ang daku og kahigayonan nga makasulod og trabaho og makakita og panginabuhian.

Samtang sa wa pa ang SOCA ni mayor Cortes naaprobahan sa mga sakop sa konseho sa siyudad ang ordinansa nga naghatag og cash incentives sa tanang government workers sa siyudad.

Lakip na usab ang umento sa honorarium nga P600 matag buwan sa trabahante sa clean and green ingon man sa mga barangay health workers nga dunay umento nga P57.00 matag adlaw nga honorarium sa mga job order workers.  

Gipasigarbo usab sa mayor nga ang mga paningkamot alang sa pagpalambo sa serbisyo sa siyudad sama sa online business transactions, licensing processes, ug uban pa maoy nakatampo nga ang siyudad naila nga Most Business-Friendly local government unit-City Level sa Philippine Chamber of Commerce and Industry. (BANAT NEWS)