CCPO nipasalig nga masulbad sa daling panahon ang pagpatay ni Tocmo  

CEBU, Philippines — Gipasalig ni Police Lieutenant Colonel Janette Rafter, deputy director for operations sa Cebu City Police Office (CCPO) nga paningkamutan nila nga masulbad ang kaso ug mahatagan og hustisya ang kamatayon ni Rea Mae Tocmo.

Ang patay’ng lawas ni Tocmo napalgan kini diha sa daplin sa karsada sa Sitio Mohon, Barangay Tisa, Siyudad sa Sugbo nga gisulod og carton.

Matud ni Rafter nga nimando si Police Colonel Ireneo Dalogdog, direktor sa CCPO nga tabangan ang Labangon Police Station 10 sa ilahang imbestigasyon hinungdan nga niumol sila og grupo nga gilangkuban sa mga intelligence officer sa 11 ka police stations sa CCPO.

Gibutyag ni Rafter nga anaa sa ‘right track’ ang imbestigasyon nga ilang gihimo kini gumikan sa mga lead nga nakuha nila samtang nagpadayon ang imbestigasyon.

Wala pa gihapon gibutyag sa CCPO ang mga lead nga ilang nakuha kini aron dili maapektohan ang imbestigasyon nga gihimo sa kapolisan.

Nasayran nga ang grupo nga giumol sa CCPO lahi-lahi ang tahas diin ang mga resulta sa gihimo nilang imbestigasyon usahon aron matumbok ang hinungdan sa maong kaso ug responsable niini.

Mapasalamaton ang kapolisan nga cooperative ang mga kauban ni Tocmo sa boarding house lakip na ang mga establisamento nga giadto sa kapolisan aron makakuha og footage sa close circuit television (CCTV) camera.

Sa pagsuwat niining balita wala pa mopatim-aw sa CCPO ang drayber sa motorsiklo nga gisakyan ni Tocmo ug giklaro sa kapolisan nga ang “person of interest” dili pa kini suspect apan gikonsiderar lang sila nga makatabang sa imbestigasyon.

“Although naay driver pero wala pa gyud ta kabalo sa kinatibuk-ang istorya. So, siguro gyud amo ning paningkamutan, we are getting near to it”, matud sa opisyal.

Wala hatagi og time frame ang CCPO sa pagsulbad sa krimen apan gipaniguro nila nga sa labing dali nga panahon masulbad ang maong krimen. BDB (BANATNEWS)