Mandaue nagkinahanglan og dugang classrooms alang sa BSKE
CEBU, Philippines — Ang 660 ka classrooms sa mga publikong tunghaan sa Siyudad sa Mandaue maoy gamiton sa Commission on Election (Comelec) isip mga voting precinct sa umaabot nga Barangay ug Sangguniang Kabataan elections nga gikatakda sa Oktobre 30, 2023.
Kini ang gibutyag ni Atty. Ann Fleur Gujilde, city election officer sa siyudad.
Matud ni Gujilde nga 27 ka barangay sa Siyudad sa Mandaue ang adunay panginahanglan sa mga classroom nga magamit nunot sa pagsaka sa mga narehistro nga mga botante niining mga panahona.
Nagpadayon ang ilang pagpangrehistro diin nagsaka ang gidaghanon sa mga botante sa siyudad ug nagkinahanglan og dugang mga classroom nga magamit. Si Gujilde nagkanayon nga nunot sa maong panginahanglan ilang gitinguha ang pagbutang og mga payag-payag isip mga classroom sa paghatag og kahigayonan sa mga narehistrong botante nga makabotar sa umaabot nga pinilay sa Barangay ug Sangguniang Kabataaan.
Naglakip sa mga barangay nga adunay panginahanglan og dugang nga mga classroom mao ang Bakilid, Banilad, Cubacub, Guizo, Ibabao-Estancia, Labogon, Pagsabungan, Maguikay ug Tabok diin isip pagkab-ot sa 660 ka classrooms adunay 42 ka classrooms ang gikinahanglan nga madugang niini. —/BDB (BANAT NEWS)
- Latest