Duha ka adlaw nga SACLEO milyones nga drugas nasakmit

CEBU, Philippines — Sagunson nga Simultaneous Anti-Criminality Law Enforcement Operation (SACLEO) sa nagkadaiyang dapit sa Cebu miresulta sa pagkasakmit sa milyones nga kantidad sa ilegal nga drugas, armas, pagkasikop sa mga wanted sa balaod, mga sugarol ug mga malapason sa lokal nga mga ordinansa sugod Hunyo 11 hangtud 12.

Sa Cebu City, gibanabana nga kapin sa P4 milyones nga balor sa ilegal nga drugas ang nasakmit sa Cebu City Police Office (CCPO) sa 39 ka operasyon sa ilegal nga  druga nga gihimo. Base sa report nga gisumitir ngadto kang Police Colonel Ireneo Dalogdog, CCPO City Director, 35 ang nadakpan, upat nila high value individual (HVI) samtang 35 ka street level individual (SLI).

Moabot 594.07 gramong shabu ang nasakmit nga nagkantidad  og P4,039,676 .

Samtang sa kampanya batok sa anti-illegal gambling,  45 ka operasyon ang  gihimo ug  75 ka tawo ang nadakpan. Lima ka armas sab ang nasakmit ug upat ka tawo ang nasikop.

Samtang  228 man hunt operations ang gipahigayon sa kapulisan nga mi resulta sa pagka arresto  sa 20  ka mga wanted.

Sa laing operasyon, upat ka tawo ang nadakpan sud sa usa ka drug den atol sa buy-bust operation nga gihimo sa PDEA Cebu Provincial Office ug Cebu City Police Office Station 6 sa Sitio Galilee, Barangay Duljo Fatima, siyudad sa Sugbo sa miaging gabii.

Nadakpan ang subject sa operasyon ingon man drug maintainer nga si Junito Abaya alyas Tatay, 56, ug ang parokyano niyang sila si Welmar Jacilo Hulleza, 18; Patrick Bajarias, 21,; ug Jeremy Diaz, 21.

Unom ka putos sa gituohang shabu nga motimbang og 13 grams ug mobalor og P88,400, buy-bust money ug drug paraphernalia ang nasakmit.

Samtang sa Liloan, 15.92 gramong gituohang shabu ang nasakmit, duna say us aka sugarol nga nadakpan, duha ka paltik. 38 nga revolver ug  15 ka citation ticket ang na-issue, siyam ka motor ang na-impound.

Sa laing operasyon nadakpan ang 10 ka personalidad ug nasakmit ang P1.2 milyon nga balor sa illegal nga drugas.

Gipangulohan ni Police Lieutenant Colonel Randy Caballes, hepe sa Talisay Police Station ang operasyon batok sa pito ka tawo sa ilegal nga drugas, tulo alang sa service of warrants, duha sa Oplan Katok, ug 115 alang sa pagpatuman sa mga lokal nga ordinansa.

Samtang ang Barili Municipal Police Station pinangulohan sa hepe niini nga si Police Major Janus Giangan nakasikop sa buy-bust operation og usa ka drug personality, usa ka sugarol, 54 ka mga Municipal Traffic Ordinance ug usa ka armas ang gi-turnover.— Decemay Padilla, ug reports nilang Paolo Anton Nabaja, UV Intern  ug  Jhayrei Pintac, Dannahli Pogado, CNU Interns, IBM (BANATNEWS)