Dul-an p14 milyones nga shabu nasakmit sa buy-bust

CEBU, Philippines —  Mokabat sa P13.7 milyones nga kantidad sa illegal nga drugas nga shabu ang nasakmit sa mga otoridad gikan sa 25 anyos nga drug personality atol sa buy-bust operation sa Purok 1, Danao, Panglao, Probinsiya sa Bohol, Biyernes sa gabii.

Ang binulto nga drugas nga motimbang og 2, 025 gramos nakuha gikan ni Roel Borja nga residente sa barangay Tawala lungsod sa Panglao.

Matud ni Police Major Andie Corpus, Hepe sa Panglao Municipal Police Station nga ilang gimonitor ang kalihukan sa suspek ug wala sila magdahom nga ingon ana kadako ang ilang makuha.

Apan wala motug-an ang dinakpan kun asa gikan ang iyang suplay sa drugas ug nasuta nga dili lang sa Panglao ang iyang area of distribution kundili apil na usab sa Tagbilaran.

“Base sa among kuan impormasyon kay kamulo paman mi og conduct og investigation kung dugay na kaayo (illegal activity) amo pa gisusi”, sigon ni Major Corpus.

Samtang sa hiniusang operasyon sa Philippine Drug Enforcement Agency(PDEA)-7, Cebu City Police Office Station 9 ug Naval Intelligence and Security Force (NISF) duha ang nadakpan atol sa buy-bust operation sa sitio Lower Kalunasan, Barangay Kalunasan, siyudad sa Sugbo sa miaging adlaw.

Ang mga nadakpan mao sila si Ritchie Paul Taborada, 27 anyos, wala’y trabaho ug si Enrique Bering, 38 anyos, usa ka plumber.

Nakuha gikan kanila ang duha ka putos sa shabu nga motimbang og 50 grams nga mikantidad og P340,000, buy-bust money ug mobile phones.

Nasuta sa PDEA nga ang mga dinakpan maka-dispose og 500 grams sa shabu kada semana.

Sa laing bahin nasikop sa Barangay Campo 4, Dakbayan sa Talisay ang 23 anyos nga lalaki human gialarma nga nagdala og armas ug nakuhaan usab og shabu.

Ang dinakpan mao si Reymart Abalo Nacua, ulitawo nga nagpuyo sa maong lugar.

Si Police Lt. Col. Randy Caballes, hepe sa kapolisan sa Talisay nitataw nga nakadawat sila og tawag labot sa armadong lalaki sa dapit ug sa ilang pagresponde, nakit-an ang suspek nga nagbitbit og usa ka .45 nga pistola nga adunay pito ka buhing bala.

Nakuha sab ang shabu nga nitimbang og 3.4 gramos nga gibana-bana nga mobalor og P28,120. Gabriel C. Bonjoc/MEL (BANAT NEWS)