Minglanilla dili pa mahimong siyudad karong tuiga

CEBU, Philippines —  Giangkon ni Mayor Rajiv Enad sa Lungsod sa Minglanilla nga dili pa mahimong siyudad ang ilang lungsod karong tuiga.

Kini human nga iyang nasayran nga nisaka ang income requirement nga gikan sa P165 milyones karon nahimo na kini nga P300 ngadto sa P500 milyones. Ubos sa balaod, mamahimo nga siyudad ang usa ka lungsod kong makaabot kini sa gipangayo nga land area, populasyon ug income.

Gibasehan ni Enad ang iyang pakighinabi sa mayor sa Lungsod sa Balamban kinsa nangindahay usab nga mahimo nga dakbayan ang ilang lungsod.

Matud ni Enad nga wala una nila panumbalinga ang maong sitwasyon diin ang ilang gihimo karon mao ang pagtutok sa pagpalambo sa ekonomiya sa lungsod ug sa kinabuhi sa mga Minglahanon.

Sa pagkakaron, nagpadayon ang 100 ka ektarya nga reclamation sa lungsod nga himuon nila nga commercial ug industrial hub nga posibleng makahatag og 20 mil ka trabaho sa mga residente sa lungsod.

Nagtuo si Enad nga sa proyekto unya nga international port makadugang usab kini sa pagsaka sa ekonomiya sa lungsod. — BDB (BANATNEWS)